ءجۇرسىن ەرمان ەلباسىعا: ايتىس اقىندارىنىڭ ارقاسىنان قاعىپ قويساڭىزدار
بۇل تۋرالى Sputnik قازاقستان حابارلايدى.
ءجۇرسىن ەرمان ۇلكەن ساحنالاردا ءسوز باستاپ جۇرگەنىمەن، ەلباسىنىڭ مىسى باسىپ، ءسال قوبالجىپ تۇرعانىن جەتكىزدى.
«ءبىراق قوبالجىعانىممەن، جۇرەگىمدەگى ءسوزىمدى ايتامىن. ايتىس تۋرالى ءبىر اۋىز ءسوز ايتپاي كەتسەم، مەنى 150 اقىن ءتۇتىپ، جەپ قويادى. تاۋەلسىزدىك جىلدارىندا وتكەن ايتىستاردىڭ بارلىعىندا ءسىزدىڭ ءسوز پورترەتىڭىزدى جاساعان ۋاقىتتا زالداعى مىڭداعان حالىق شۋىلداپ، گۋىلدەپ، قولداپ وتىرعان كەزدە كەيدە كوزىمە جاس كەلەدى. مۇنى جاعىمپازدىقپەن ايتىپ وتىرعان جوقپىن. ءسىزدىڭ سايلاۋلارىڭىزدىڭ الدىندا ءۇش رەت اقىندار ايتىسىن جاسادىم. سونىڭ بارىندە ءسىزدىڭ بەينەڭىزدى اقىندار كوككە كوتەرگەن كەزدە مەن قازاقتىڭ ونەرىنىڭ قۇدىرەتىنە تاڭ قالامىن»، - دەدى ءجۇرسىن ەرمان.
ونىڭ ايتۋىنشا، قازىر ۇلتقا جاني اشيتىن تەك بەس- التى ازاماتتىڭ ارقاسىندا عانا ايتىس كۇنىن كورىپ وتىر.
«الماتىداعى باۋىرجان بايبەك، اتىراۋداعى نۇرلان نوعايەۆ، كەشەگى باقتىقوجا ىزمۇحامبەتوۆ، بەردىبەك ساپاربايەۆ، قىرىمبەك كوشەربايەۆ، التاي كولگىنوۆ اكىمدەر ايتىستى قولداپ وتىر. وسى ازاماتتاردىڭ كومەگىمەن عانا كۇن كورىپ وتىرمىز. اقىندار ءسىزدىڭ ساياساتىڭىزدى ناسيحاتتاۋ ءۇشىن وتقا دا، سۋعا دا تۇسۋگە دايىن وتىر. ارقاسىنان قاعىپ قويسا بولدى، ءارى قاراي سايراي بەرەدى»، - دەدى ەرمان.
ءوز كەزەگىندە مەملەكەت باسشىسى قازىرگى ايتىستىڭ دەڭگەيىن كوتەرۋ قاجەتتىگىن ايتىپ ءوتتى.
«ايتىس ءبىزدىڭ تامىرىمىز، ءداستۇرىمىز. مەنىڭ ماقالاما بۇل دا كىرەدى. مەنىڭشە، ايتىستار وبلىستاردا وتسە، سوسىن ونىڭ جەڭىمپازدارىن رەسپۋبليكا بويىنشا كورسەتسەك. انىنە ءسوزى ساي بولسا دەيمىن. قىرعىزداردا، باسقا ەلدەردە بار، سولاردىڭ ءانى دە كەرەمەت، ءار ءسوزى دە فيلوسوفيا. «سەندەر مىنانى ايتىڭدار، نازاربايەۆتى ماقتاڭدار» دەپ كوماندا بەرەدى، سوسىن كەتەدى. كەيدە ونىڭ ىشىندە نەشى ءتۇرلى بالەلەر ايتىلىپ كەتەدى»، - دەدى ەلباسى.
«قازىر كوپتەگەن تالانتتى جاستار شىعىپ كەلە جاتىر. ولاردى حالىقارالىق دەڭگەيگە شىعارۋعا ۇيالمايمىز. ارقاسىنان قاعىپ قويساڭدار بولدى، ەلدىڭ مارتەبەسىن كوتەرە بەرەدى»، - دەدى ءجۇرسىن ەرمان.
