قازاقستاندىق عالىمدار بابالار ىزىمەن ساپارعا اتتانادى
ولار ەجەلگى عۇندار، تۇرىكتەر، قىپشاقتاردىڭ ءىزى قالعان الەمنىڭ 15 ەلىنە بارادى، دەپ حابارلايدى «قازاقپارات» ح ا ا ءتىلشىسى.
65 كۇنگە سوزىلاتىن بۇل ساپاردا ەكسپەديتسيا توبى قازاقستان، رەسەي فەدەراتسياسى (كاباردينو-بالقار رەسپۋبليكاسى، قاراشاي-شەركەش رەسپۋبليكاسى، داعىستان رەسپۋبليكاسى)، ازەربايجان، ارمەنيا، گرۋزيا، ۋكراينا، مولدوۆا، سلوۆەنيا، بەلارۋس، ليتۆا، پولشا، گەرمانيا، فرانسيا، ۆەنگريا، يتاليا، ۆاتيكان جەرلەرىن ارالايدى جانە ارعى اتا-بابالارىمىزدىڭ ەجەلدەن قازىرگى زامانعا دەيىنگى كوشى-قون جاعدايىمەن تانىسىپ، د ن ق زەرتتەۋلەر جۇرگىزەدى.
«ءبىز اتا-بابامىزدىڭ تۇلپارىنىڭ ءدۇبىرى جەتكەن جەرلەردى ارالاۋدى كوزدەپ وتىرمىز. بۇل اۋماق باتىستا اتلانت تەڭىزىنە دەيىن سوزىلسا، شىعىستا ءۇندىستان، سولتۇستىكتە رەسەي اۋماعىن قامتيدى»، - دەدى ەكسپەديتسيا جەتەكشىسى، س. نۇرماعامبەتوۆ اتىنداعى حالىقارالىق قوعامدىق-قايىرىمدىلىق قوردىڭ استانا قالاسى فيليالىنىڭ پرەزيدەنتى، حالىقارالىق تۋريزم جانە سپورت اكادەمياسىنىڭ اكادەميگى ساپار ىسقاقوۆ.
ساياحاتشى اتالعان 15 مەملەكەتتەگى زەرتتەۋ جۇمىستارىنىڭ قالاي جۇرەتىنىن ايتىپ بەردى. «ءبىز ولاردىڭ عالىمدارىمەن كەزدەسىپ، جەرگىلىكتى تۇرعىندارمەن اڭگىمەلەسەمىز. ولاردان د ن ق سىناماسىن الىپ، تاريحي ماتەريالداردى زەرتتەيمىز»، - دەدى ول.
ەكسپەديتسيا اياقتالعان سوڭ، عىلىمي توپ مۇشەلەرى دەرەكتى فيلم توپتاماسىن جارىققا شىعارادى. وندا بابالارىمىز بولعان ايماقتار مەن مادەني-ارحيتەكتۋرالىق ەسكەرتكىشتەر جانە بەلگىلى تاريحشىلار مەن زەرتتەۋشىلەردىڭ سۇحباتتارى كورسەتىلەدى.
سونىمەن بىرگە، ەكسپەديتسيادا حالىقارالىق ۇيىمداردىڭ وكىلدەرىمەن كەزدەسۋ، ولاردى «ەكسپو - 2017» حالىقارالىق مامانداندىرىلعان كورمەسىنە شاقىرۋ، سول ارقىلى حالىقارالىق ارەنادا ەلىمىزدىڭ يميدجىن كوتەرۋ كوزدەلگەن.
ساپار بارىسى تۋرالى «حابار 24» ارناسىندا جانە ەكسپەديتسيانىڭ فەيسبۋك پاراقشاسىندا كۇندەلىكتى حابارلانىپ وتىرادى.
