وسكەمەندە ەرتىسكە قۇلاپ كەتكەن بويجەتكەن قۇتقارىلدى
جانۇشىرعان داۋىستى ەستىگەن قۇرىلىسشىلار مەن سول ماڭداعى قوعامدىق كۇزەت كەزەگىندە جۇرگەن ەكى پوليتسەي جەدەل باسقارۋ ورتالىعىنان حابار كەلىپ جەتكەن سوڭ كومەككە ۇمتىلادى. ولار كۇش جۇمىلدىرىپ قيىن جاعدايدا قالعان 19 جاستاعى ستۋدەنت قىزدى قۇتقاردى. «قىزدى قۇتقارۋ وڭايعا سوقپادى، ويتكەنى بۇل تۇستا وزەننىڭ اعىسى قاتتى ءارى تەرەڭ ەدى، سونداي-اق جاعالاي سۋدان ءۇش مەتردەي بيىك بولاتىن. سوندىقتان جاعاداعىلار قۇرىلىس كرانىن پايدالاندى»، - دەدى ش ق و ءى ءى د باسپا ءسوز قىزمەتىنىڭ جەتەكشىسى باقىتجان تورعايەۆ.
بويجەتكەندى پوليتسيا قىزمەتكەرلەرى رۋستام اعىبايەۆ پەن راۋان جاقسىلىقوۆ جەدەل جاردەم كەلگەنشە پوليتسيا بەكەتىنە جەتكىزىپ، قۇرعاق كيىم بەرىپ، ىستىق شاي ۇسىنعان. بويجەتكەن وقيعانىڭ قالاي بولعانىن ايتىپ بەرگەن. ول جاعالاۋدا قىدىرىپ ءجۇرىپ، جاعالاۋدىڭ قورشاۋىنا شىعىپ (پاراپەت) وتىرعان. قاتتى اعىسقا قاراپ وتىرعاندا كەنەتتەن باسى اينالىپ سۋعا قۇلاپ كەتكەن. دارىگەرلەر بويجەتكەننىڭ دەنساۋلىعىنا ايتارلىقتاي قاۋىپ تونبەگەنىن انىقتادى. ويتكەنى ول سۋىق سۋدا كوپ بولماعان ءارى پوليتسەيلەر ونى دەر كەزىندە جىلىتىپ سالقىن ءتيۋدىڭ الدىن الدى.
اۆتور: جانىبەك امانگەلدى
