ديماشتىڭ استانادا وتەتىن كونسەرتىنىڭ بيلەتتەرى قانشا تۇراتىنى بەلگىلى بولدى
27 - ماۋسىمدا «استانا- ارەنا» ستاديونىندا ديماش قۇدايبەرگەننىڭ جەكە ءان كەشى وتەتىنى بەلگىلى. بۇگىندە اتالعان كونسەرتتىڭ بيلەتتەرى ساتىلىمعا شىققان.
«تيكەتون» سايتىنىڭ مالىمەتىنشە، ديماشتىڭ كونسەرتىنە ساتىلىپ جاتقان بيلەتتەردىڭ ەڭ ارزانى 2000 تەڭگەنى قۇرايدى ەكەن. بۇل ستاديوننىڭ وڭتۇستىك- شىعىس جانە وڭتۇستىك- باتىس سەكتورلارىنداعى ورىندار. ال، شىعىس پەن باتىس سەكتورلارداعى ورىندار - 3000 تەڭگە.
ديماشتى جاقىننان كورىپ، ءانىن انىعىراق ەستىگىسى كەلەتىندەر كەم دەگەندە 8 مىڭ تەڭگەگە بيلەت ساتىپ الۋ كەرەك. ساحنانىڭ جانىندا ورنالاسقان سەكتوردىڭ جوعارعى ورىندارى - 8000, تومەنگى ورىندارى 10000 تەڭگە تۇرادى.
ايتا كەتەيىك، بۇگىن استانالىقتار ديماش قۇدايبەرگەندى استانا اۋەجايىنان كۇتىپ العان بولاتىن. قايتالانباس داۋسىمەن قىتايدى باعىندىرعان جەرلەسىمىز Singer-2017 حالىقارالىق ءان بايقاۋىندا ەكىنشى ورىن الىپ، «اسپان استى ەلىندە» بىرنەشە كونسەرت بەردى.
