بوكسشىلارىمىز بەن بالۋاندارىمىز جاتتىعۋدان كەيىن قازى مەن قارا ۋىلدىرىق جەگىسى كەلەدى
بۇل تۋرالى بۇگىن ق ر پارلامەنتى سەناتىنىڭ الەۋمەتتىك-مادەني دامۋ جانە عىلىم كوميتەتىندە «دەنە تاربيەسى جانە سپورت ماسەلەلەرى بويىنشا ق ر- نىڭ ءبىرقاتار زاڭنامالىق اكتىلەرىنە وزگەرتۋلەر مەن تولىقتىرۋلار ەنگىزۋ جونىندەگى» زاڭ جوباسىن تالقىلاۋ بارىسىندا مادەنيەت جانە سپورت ۆيتسە-ءمينيسترى ساكەن مۇسايبەكوۆ ءمالىم ەتتى، دەپ حابارلايدى قازاقپارات.
وسى رەتتە دەپۋتاتتار ۆيتسە-مينيستردەن زاڭ جوباسىنا ەنگىزىلىپ وتىرعان «تابيعي نورما» تۇسىنىگىن تارقاتىپ بەرۋدى سۇرادى.
«سپورتشىلاردىڭ جاتتىعۋ كەزىندەگى جۇكتەمەسى سيكلدىك، كۇشتىك جانە قولدانبالى دەپ ۇشكە بولىنەدى. جۇكتەمەنىڭ بۇل ءۇش ءتۇرىنىڭ ايىرماشىلىعى بار. سوندىقتان كالوريانىڭ جۇمسالۋىنا بايلانىستى تابيعي نورما دا ءارتۇرلى بولادى»، - دەدى ول.
وسى رەتتە سەناتور ءبىراعانىم ءايتىموۆا سپورتتىڭ كەيبىر تۇرلەرىنىڭ بەلگىلى ءبىر دەڭگەيدەگى قاجەتتىلىگىنە بايلانىستى ىرىكتەلگەن ەتپەن قامتاماسىز ەتۋ جۇرگىزىلە مە دەپ سۇرادى.
«ءبىز جوعارى جەتىستىكتەر سپورتى جايىندا ايتىپ وتىرمىز. ءبىزدىڭ ءاربىر كوماندانىڭ سپورتتىق مەديتسينادان كەلگەن دارىگەرى بار جانە ديەتولوگتار دا شاقىرىلادى. ولار سپورتشىلار جاتتىعۋدان كەيىن قايتا تەز كۇش جيناۋى ءۇشىن قاجەتتى اس مولشەرىن انىقتايدى. سپورتشىلار مۇنى تەرىس كورىپ وتىرعان جوق. دەگەنمەن، بوكس، كۇرەس، دزيۋدو سىندى كۇش قولدانىلاتىن سپورت تۇرلەرىنىڭ اتلەتتەرى قازى مەن قارا ۋىلدىرىق سۇرايدى. بۇل تاعامدار ولاردىڭ تەز كۇش جيناۋىنا كومەكتەسەدى»، - دەدى س. مۇسايبەكوۆ.
«بۇل استامشىلىق. ال ءبىز سپورشىلاردى استامشىلىققا دايىنداپ وتىرعان جوقپىز»، - دەدى ءوز كەزەگىندە سەناتور.
اۆتور: مارلان جيەمباي
