فۋتبولشىلارىمىزدىڭ سۇرەڭسىز ويىنى دەپۋتاتتاردىڭ دا نامىسىنا تيۋدە

«ءبىز كوپتەگەن فۋتبولشىلاردى شەتتەن اكەلەمىز، قىمباتقا ساتىپ الامىز. ولاردىڭ بارلىعى جەرگىلىكتى جەرلەردە بيۋدجەت ەسەبىنەن قارجىلاندىرىلادى. ال ناتيجەسى قانداي؟ ماسەلەن وتكەندە الەم بىرىنشىلىگىنىڭ ىرىكتەۋ كەزەڭى اياسىندا ارمەنيادان جەڭىلدىك. بىزدە 30 پايىزعا دەيىن لەگيونەرلەر، ارمەنيادا 100 پايىز جەرگىلىكتى فۋتبولشىلار وينايدى. ارمەنيادا 6 اق ميلليون حالىق بار. ارمەنيانىڭ بيۋجەتى قازاقستاننان 10-15 ەسە از. سپورتقا دا سولاي بولىنەدى. ال بىزدە نامىسقا تيەتىن وسىنداي ناتيجەلەرىمىز بار. مەن تەك ءبىر ۇلتتىق بالالارىن جيناڭدار دەمەيمىن. ءبىراق، قازاقستانداعى بارلىق ۇلت وكىلدەرىمەن ءوزىمىزدىڭ جاستارىمىز وينايتىن كوماندا قاشان شىعادى؟»، - دەدى ول ق ر پارلامەنتى سەناتىنىڭ الەۋمەتتىك-مادەني دامۋ جانە عىلىمي كوميتەتىنىڭ «دەنە تاربيەسى جانە سپورت ماسەلەلەرى بويىنشا ق ر- نىڭ ءبىرقاتار زاڭنامالىق اكتىلەرىنە وزگەرتۋلەر مەن تولىقتىرۋلار ەنگىزۋ جونىندەگى» زاڭ جوباسىن تالقىلاۋ بارىسىندا.

ونىڭ اتاپ وتۋىنشە، ەلىمىزدە سپورتتى دامىتۋعا مەملەكەت تارابىنان مول قارجى بولىنۋدە. سوندىقتان ونىڭ ماقساتتى جۇمسالۋى جانە ناقتى ناتيجەنىڭ بولۋى وتە ماڭىزدى.

«بۇگىنگى قارالعان زاڭ جوباسىنا سايكەس وسى ۋاقىتقا دەيىن سپورت مەكتەپتەرىنە سپورت باسقارمالارى نەمەسە مينيسترلىكتىڭ بولىمدەرى ارقىلى بولىنگەن قاراجات ەندى قوعامدىق ۇيىمدارعا بەرىلەدى. ول ۇيىمداردىڭ بارلىعى قوعامدىق ۇيىمدار. ولار بۇرىن-سوڭدى مۇنداي ۇلكەن قاراجاتپەن جۇمىس جاساماعان. سوندىقتان قوعامدىق ۇيىمداردىڭ، فەدەراتسيالاردىڭ مەملەكەت قاراجاتىن جۇمساۋىنا باقىلاۋدى كۇشەيتۋ قاجەت دەپ ويلايمىن. سپورتتىق نەگىزگى كورسەتكىشتەرىنىڭ سوڭىنان جۇگىرىپ ءجۇرىپ قاراجاتتىڭ ماقساتتى پايدالانۋىن جوعالتىپ الماۋىمىز كەرەك»، - دەدى بەكتايەۆ.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى