ازامات ساتىبالدى: قازاق - باقىتىن بالاسىنان ىزدەيتىن جالعىز ۇلت
ونىڭ ايتۋىنشا، وزىنە سەنىمسىز رەجيسسەرلەر عانا تۋىندىسىنا تانىمال جۇلدىزداردى شاقىرادى. مۇنىمەن قاتار، ول قازاق قوعامى ءۇشىن بالانىڭ ماڭىزدى ەكەنىن ايتىپ ءوتتى.
بۇل تۋرالى ن ت ك ارناسىنىڭ «رەۆيۋ» باعدارلاماسىندا ايتىلدى.
- كينوپروديۋسەر يدەياسى قاشان تۋىندادى؟
- مەنىڭشە، ءاربىر ادامنىڭ، ءاربىر ونەرپازدىڭ جەمىس سەكىلدى پىسەتىن ۋاقىتى بولادى. اباي اتامىز ايتپاقشى، ادام ءوزىن ۇنەمى كەمەلدەندىرىپ وتىرۋى ءتيىس. ياعني ءوزىمدى ونەر ادامى رەتىندە جەتىلدىم دەپ ويلايمىن. بيىل مەن ءۇشىن ءساتتى، تابىستى جىل بولدى. قوس ارمانىم بىردەي ورىندالىپ وتىر: تەاتر اشىپ، جەكە پروديۋسەرلىك ورتالىعىمنان جەكە كينو تۋىندىم جارىق كورىپ وتىر.
- بۇل فيلم قۇرساق انانىڭ كومەگى جۇگىنگەن جۇپ جايلى. اتالعان تۋىندى كورەرمەندى قانداي ويعا جەتەلەيدى.
- مەن قازاقتى بالاسىز ەلەستەتە المايمىن. قازاق - باقىتىن بالاسىنان ىزدەيتىن جالعىز ۇلت. وسى تاقىرىپقا ارداق تولەۋباي ەكەۋىمىز قالام تارتتىق. بۇل تاقىرىپقا قاتىستى كوپتەگەن پروبلەما بار. كوپ ادام بۇل تۋرالى، ءتىپتى، ءسوز قوزعاعىلارى كەلمەيدى. بالا بولماعاندىقتان، وتباسىنىڭ اراسىنان جانجال شىعىپ، اجىراسىپ جاتادى. ءبىر- بىرىنە سەنبەيدى. قوس عاشىق ۇيلەنگەن سوڭ ءبىر- بىرلەرىنە سەنىم ارتۋلارى ءتيىس. ساعان قانشا جىلدان كەيىن بالا بەرەتىنىن اللانىڭ ءوزى بىلەدى. كينونى ماحابباتقا، ۇمىتكە قۇردىق. سول توڭىرەكتە ستسەناريي جازىپ، سونى مۇمكىندىگىنشە جەتكىزۋگە تىرىستىق.
- جوباڭىزدىڭ كوممەرتسيالىق تۇرعىدان تابىستى بولاتىنىنا سەنەسىز بە؟ الدە تۇپكى ماقسات باسقا ما؟
- مەنىڭ باستى ماقساتىم - تابىس تابۋ بولسا، كومەديا تۇسىرەتىن ەدىم. قازىر حالىقتى ءبىز كومەدياعا ۇيرەتىپ قويدىق. ال وسى تۇستا مەنىڭ باستى ماقساتىم - كورەرمەنگە وي سالۋ. وي سالۋ ءۇشىن كۇردەلى تاقىرىپتار قوزعالۋى ءتيىس. ەڭ باستىسى، وسى تاقىرىپ تىم كۇردەلەنىپ كەتپەۋى ءتيىس. ادامنىڭ جۇرەگىنە جىلى جەتۋى ءتيىس.
- اكتەرلىك قۇرام تۋرالى ايتىپ وتسەڭىز... اكتەرلىك قۇرامدى «ۇيرەنبەك جاۋ اتىسپاققا جاقسى» دەپ تاڭداعان سياقتىسىز
- وتە دۇرىس ايتىپ وتىرسىڭ. سەبەبى، باستى رولدەگى زارينا ەكەۋىمىز تەاترداعى ەكى قويىلىمدا قاتار وينادىق. ول ەكەۋى دە وتە ءساتتى شىقتى. اكتەر رەتىندە وزىڭمەن ۇندەسەتىن جۇبىڭدى تابۋ وتە قيىن. ال كينودا بۇل ماسەلە تىپتەن قيىن. ارداق تولەۋباي ەكەۋىمىز ستسەنارييدى جازىپ وتىرىپ، ايجاننىڭ رولىنە زارينانى تاڭدادىق. ول كەلىسىمىن بەرگەننەن كەيىن عانا ستسەنارييدى جازا باستادىق. ℅95 كاسىبي اكتەرلەردى الۋعا تىرىستىق.
- ءسىزدىڭ كارتيناڭىزدى انشىلەر مەن ۆاينەرلەر بار ما؟
- مەنىڭشە، ءاربىر ادام ءوز ىسىمەن اينالىسۋى ءتيىس. قازاقتا «تورعاي سويسا دا، قاساپشى سويسىن» دەگەن ادەمى ماقال بار. ءانشى ءان ايتۋى كەرەك، اكتەر ساحنادا ويناۋى ءتيىس، ال رەجيسسەر ءتۇسىرۋى كەرەك. مەنىڭ تۇسىنىگىمدە ۆاينەرلەر مەن اكتەرلەردى كينوسىنا وزىنە سەنىمسىز ادام شاقىرادى. ول درامۋتۋرگياداعى ويىن كورەرمەنگە جەتكىزۋگە قورىقققاننان كەيىن سونى تانىمال ادامدار ارقىلى جەتكىزگىسى كەلەدى. ال مەنىڭ تۋىندىم 27 -ءساۋىر كۇنى جارىققا شىعادى.
