روبوت تەحنيكاسى قازاقستان مەكتەپتەرىندە مىندەتتى پاندەردىڭ ءبىرى بولۋى مۇمكىن

قاراعاندى وبلىستىق اكىمدىگىنىڭ باسپا ءسوز قىزمەتى حابارلاعانداي، قاتىسۋشىلار 24 نوميناتسيا بويىنشا باق سىناسقان. فەستيۆالعا 800 بالادان قۇرالعان 400 كوماندا قاتىستى. باعدارلامادا لابيرينتتەر، مەحانيكالىق جانە ينتەللەكتۋالدىق سۋمو جارىسى، كەگەلرينگ جانە روبوتتارعا ارنالعان فۋتبول، 3-D- پروتوتيپتەۋ، كۆادروكوپتەرلاردى باسقارۋ جانە ت. ب. بولدى.

قازىلار القاسىنا WRO حالىقارالىق سىنىبىنىڭ سۋدياسى، سانكت- پەتەربۋرگ اقپاراتتىق تەحنولوگيالار، مەحانيكا جانە وپتيكا ۇلتتىق زەرتتەۋ ۋنيۆەرسيتەتىنىڭ مۇعالىمى الەكساندر كاپيتونوۆ باسشىلىق ەتتى.

 «فەستيۆالدىڭ اشىلۋىنا ءبىلىم جانە عىلىم ءمينيسترى ەرلان ساعاديەۆ كەلدى. ۆەدومستۆو باسشىسى قاراعاندى وبلىسىنداعى روبوتتەحنيكاسى دەڭگەيىنىڭ جاقسى دامىعانىن اتاپ ءوتتى. ونىڭ ايتۋىنشا، بولاشاقتا بۇل سالا مەكتەپ باعدارلاماسىنا ەنگىزىلىپ، مىندەتتى پاندەردىڭ بىرىنە اينالۋى مۇمكىن. مينيسترلىكتە ءقازىر بۇل ماسەلە زەرتتەلۋدە»، - دەپ اتاپ ءوتتى اكىمدىكتىڭ باسپا ءسوز قىزمەتى.

مينيستر اتاپ وتكەندەي، مەكتەپتەرگە روبوت تەحنيكاسىن ەنگىزۋ - نەگىزگى مىندەتتەردىڭ ءبىرى.

«ءبىز الەمنىڭ باسقا ەلدەرىنەن قالىپ كەتپەۋ كەرەكپىز. 2016 -جىلى جەرگىلىكتى بيۋدجەتتىڭ قارجىلاندىرۋى مەن دەمەۋشىلىك قولداۋدىڭ ارقاسىندا 400 سىنىپتىق- كەشەندىك روبوت تەحنيكاسىن ساتىپ الدىق. 20 مىڭ بالا قوسىمشا ساباق الدى. بيىل وقۋشىلار سانىن ەكى ەسە ارتتىرۋدى جوسپارلاپ وتىرمىز»، - دەپ كەلتىرەدى ەرلان ساعاديەۆتىڭ ءسوزىن باسپا ءسوز قىزمەتى.

قاراعاندىلىقتار فەستيۆالعا ارناپ ەلىمىزدىڭ كارتاسى كەسكىنىندە RoboLand قازاقستان بىرەگەي پوليگونىن جاسادى. پوليگوندى جاساۋعا جارتى جىل ۋاقىت كەتكەن. ءىس- شارانىڭ باستى ماقساتى - روبوتتەحنيكاسىنا دەگەن قىزىعۋشىلىقتى ارتتىرۋ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى