جاس وتباسىلارعا باسپانا ساتىپ الۋ ءۇشىن العاشقى سالىم كولەمىن ازايتۋ كوزدەلۋدە

 بۇل تۋرالى بۇگىن پارلامەنت ماجىلىسىندە وتكەن وتىرىستا بانك باسشىسى ءلاززات يبراگيموۆا ءمالىم ەتتى، دەپ حابارلايدى قازاقپارات.

 ءلاززات يبراگيموۆانىڭ ايتۋىنشا، «نۇرلى جەر» باعدارلاماسى ارقىلى جەرگىلىكتى اتقارۋشى ورگانداردا كەزەكتە تۇرعان ازاماتتار ءۇشىن العاشقى سالىم كولەمى 50 پروتسەنتتەن 30 پروتسەنتكە دەيىن تومەندەتىلدى. 20 پروتسەنتتىك ايىرماشىلىق ۇلتتىق قور ەسەبىنەن وتەلەتىن بولادى. ول ءۇشىن 22 ميلليارد تەڭگە ءبولىنىپ وتىر.

جەڭىلدىكپەن بەرىلەتىن پاتەرلەردىڭ قۇنى وڭىرلەردە - شارشى مەترىنە 140 مىڭ تەڭگە بولسا، الماتى مەن استانا قالالارىندا - 180 مىڭ تەڭگەنى قۇرايدى.

 «ازاماتتاردىڭ قالعان ساناتتارى باسپانا نەسيەسىن الۋ ءۇشىن ونىڭ 50 پروتسەنتتىك سالىمىن ەنگىزۋى ءتيىس. ءبىراق قازىر ءبىز اكىمدىكتەرمەن بىرگە ونىڭ كولەمىن جاس وتباسىلار ءۇشىن تومەندەتۋ جولدارىن ىزدەستىرىپ جاتىرمىز. بۇعان قوسىمشا قارجىلىق رەسۋرستار قاجەت بولادى»، - دەپ اتاپ ءوتتى ول.

ينۆەستيتسيالار جانە دامۋ ۆيتسە- ءمينيسترى رومان سكلياردىڭ سوزىنشە، بيىل «نۇرلى جەر» باعدارلاماسى اياسىندا 25 مىڭ پاتەر پايدالانۋعا بەرۋ جوسپارلانعان. جالپى، 15 جىلدا باعدارلاما شەڭبەرىندە 1,5 ميلليون وتباسى باسپانامەن قامتىلادى دەپ مەجەلەنگەن.

 اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى