تۇرعىن ءۇي- قۇرىلىس جيناق بانكىنىڭ باسشىلارى مەن تۋىستارى مەملەكەتتىك تۇرعىن ءۇي باعدارلاماسىنا قاتىسپاۋعا مىندەتتەمە الدى

 بۇل تۋرالى بۇگىن پارلامەنت ماجىلىسىندە بانكتىڭ باسقارما ءتوراعاسى ءلاززات يبراگيموۆا ءمالىم ەتتى، دەپ حابارلايدى قازاقپارات.

 «بيىل اقپان ايىندا ءبىزدىڭ قوعامدىق كەڭەستىڭ وتىرىسى اياسىندا مەن جانە مەنىڭ ورىنباسارىم جەڭىلدىك بەرەتىن مەملەكەتتىك باعدارلامالارعا قاتىسپاۋ تۋرالى مىندەتتەمە الدىق. ول مىندەتتەمەگە ءتىپتى ءبىزدىڭ وتباسى مۇشەلەرىمىز، اتا- انالارىمىز، تۋعان باۋىرلارىمىز كىرىپ وتىر. ءبىز بۇل پروتسەستى قاداعالاپ كەلەمىز»، - دەدى بانك باسشىسى ماجىلىستەگى «نۇر وتان» فراكسياسىنىڭ وتىرىسىندا.

ونىڭ ايتۋىنشا، بانك توپ- مەنەدجەرلەرىنىڭ قاتىسۋىمەن ورىن العان اتىشۋلى وقيعا 2008-2010 -جىلدارداعى باعدارلامادا ورىن العان.

 «ول كەزدە ازاماتتار بانك تۋرالى از بىلەتىن. جيناق اشقان ادامداردىڭ باسىم بولىگى تۇرعىن ءۇي- قۇرىلىس جيناق بانكىنىڭ قىزمەتكەرلەرى بولعان. ولار ءبىرىنشى بولىپ باسپانا العانى دا زاڭدى. ولار قاتىسقان ۋاقىتتا توپ- مەنەدجەر قىزمەتىندە بولماعان. زاڭناما بۇزۋ جوق بۇل جەردە. ول كەزدە بارلىعى دا قاتىسۋعا قۇقىلى ەدى»، - دەپ ءتۇسىندىردى ل. يبراگيموۆا.

ونىڭ سوزىنشە، بۇل جەردە ءسوز ەتيكا جونىندە بولىپ وتىر. ول بانك قىزمەتى ازاماتتار ءۇشىن اشىق بولۋى كەرەك ەكەنىن مويىندادى.

«مەن ءوز تاراپىمنان بانك باسشىلىعى مەن باسقارما مۇشەلەرى تاراپىنان مۇنداي وقيعالار قايتالانباۋىنا كەپىلدىك بەرە الامىن»، - دەپ حابارلادى ول.

 ەسكە سالا كەتەيىك، تۇرعىن ءۇي- قۇرىلىس جيناق بانكى باسشىسىنىڭ بۇرىنعى ورىنباسارى ايجان مەدەۋوۆا بانك جەڭىلدىكتەرى ارقىلى وزىنە جانە ءوز تۋىستارىنا پاتەر الىپ بەردى دەگەن شۋ بۇقارالىق اقپارات قۇرالدارىندا جاريالانعان كەزدە قىزمەتىنەن كەتكەن بولاتىن. ول جەڭىلدىكپەن 3 پاتەر العانى انىقتالدى، ءبىرى - جەكە وزىنە، ەكىنشىسى - سىڭلىسىنە، ءۇشىنشىسى - بۇرىنعى كۇيەۋىنە.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى