ەلەكتروندى ۇكىمەتتى جاڭارتۋ: حالىق قۇجات ماشاقاتىنان قۇتىلادى
«بۇگىن ءبىز ءوزارا ارىپتەستىك تۋرالى حاتتامانى راسىمدەدىك. وندا وسى ۋاقىتقا دەيىنگى جۇمىستىڭ قورىتىندىسى ءارى الداعى ماقسات- مىندەت پەن جوسپارلار كورسەتىلگەن. ول جوبالاردى ءبىز كورەيالىق ارىپتەستەرمەن ىسكە اسىراتىن بولامىز. ينۆەستيتسيالار سالىنبايتىن شىعار. نەگىزگى ماقسات - كورەيانىڭ تاجىريبەسىن زەردەلەۋ، ناقتى قاي باعىتتا جۇمىس ىستەيتىنىمىزدى انىقتاۋ. مەنىڭشە، سونىڭ ارقاسىندا ءبىراز اقشانى ۇنەمدەۋگە بولادى»، - دەدى ابايەۆ جۋرناليستەرگە بەرگەن سۇحباتىندا.
قازاقپارات تىلشىسىنە سۇحبات بەرگەن «زەردە» ۇلتتىق اقپاراتتىق- كوممۋنيكاتسيالىق حولدينگى» ا ق باسقارما ءتورايىمى اسەل جيەنبايەۆا دا ەكىجاقتى حاتتامانىڭ ماڭىزدىلىعىن ءتۇسىندىرىپ بەردى.
«حاتتاما اياسىندا ءبىز» ەلەكتروندى ۇكىمەتتى» دامىتاتىن بولامىز. بۇگىندە «سيفرلى قازاقستان» باعدارلاماسى اياسىندا پرواكتيۆتى ۇكىمەتتى، ءبارىن الدىن الا بىلەتىن جانە ارەكەت جاسايتىن ۇكىمەتتى قۇرۋ مىندەتى تۇر. بۇل دەگەنىمىز، «ەلەكتروندى ۇكىمەتتىڭ» ازاماتتارعا ارنالعان بارلىق سەرۆيستەرىن دەربەستەندىرۋ قاجەت. ول ءۇشىن جاڭا تەحنولوگيالاردىڭ نەگىزىندە ءبىزدىڭ قازىرگى پلاتفورامىزدى بارىنشا جاڭارتۋ قاجەت. سەبەبى قازاقستانداعى «ەلەكتروندى ۇكىمەتتىڭ» قولعا الىنعانىنا ءبىراز ۋاقىت بولدى. ەندى، ونى زامان تالابىنا ساي جاڭارتىپ، قىزمەتتەردى بارىنشا جاڭارتۋىمىز شارت.
ماسەلەن، ايەل ادام بالا تاپسا، حالىققا قىزمەت كورسەتۋ ورتالىعىنا بارادى. سوسىن بالانى بالاباقشا كەزەگىنە قويۋ قاجەت. ال پرواكتيۆتى ۇكىمەتتىڭ نەگىزگى مىندەتى سول، اتالعان قىزمەتتەر اۆتوماتتى تۇردە ورىندالادى. جۇكتى ايەل تىركەۋدە تۇر. دەمەك، ۇكىمەت ونىڭ بالا تۋاتىنىن بىلەدى. سوندىقتان بالانى بىردەن تىركەۋگە الىپ، بالاباقشا مەن مەكتەپ كەزەگىنە قويۋى قاجەت. وندايدا ادام انىقتاما جيناپ جۇگىرمەيدى. ۇكىمەت ءبارىن ءوزى ىستەيدى، ازامات ۇكىمەتكە ەمەس، ۇكىمەت ازاماتقا قىزمەت ەتەدى. مىنە، قازىرگى تۇجىرىمدانى وسى ماقساتقا بەيىمدەپ، وزگەرتۋىمىز كەرەك»، - دەيدى جيەنبايەۆا.
ونىڭ ايتۋىنشا، قازاقستانداعى «ەلەكتروندى ۇكىمەت» ەسكىرگەن جوق. ونى قولدا بار تەحنولوگيالاردىڭ نەگىزىندە جاڭارتۋعا ابدەن بولادى. ول ءۇشىن پسيحولوگيانى عانا ەمەس، سەرۆيستەردى دە زامان تالابىنا ساي وزگەرتۋ كەرەك.
«نەگىزى، قازاقستاننىڭ «ەلەكتروندى ۇكىمەتتى» دامىتۋ سالاسىندا قول جەتكىزگەن جەتىستىكتەرى از ەمەس. ول جاعىنان ءبىز جەتەكشى ەلدەردىڭ قاتارىنا كىرەمىز. ارينە،قازىرگى جەتىستىكتەرگە مالدانىپ وتىرۋعا دا بولمايدى. ماسەلەن، حالىققا قىزمەت كورسەتۋ ورتالىقتارىن دامىتا بەرۋ كەرەك. نەگە ول جەردە ۇزىن- سونار كەزەكتەر كوپ؟ سەبەبى ەلەكتروندى ۇكىمەتتىڭ سەرۆيستەرىن قولداناتىن ادام از. سونىڭ سالدارىنان حالىقتىڭ باسىم بولىگى حالىققا قىزمەت كورسەتۋ ورتالىقتارىنا بارادى. الايدا قازىردىڭ وزىندە ەلەكتروندى ۇكىمەت ارقىلى ءبىراز قۇجاتتاردى ۇيدەن شىقپاي- اق الۋعا بولادى. جالپى، ح ق ك و- لار جانە egov.kz سايتى ارقىلى 700-دەن استام قىزمەت ءتۇرى كورسەتىلەدى. ونىمەن ۋاقىت تا، ادامنىڭ كۇش- قۋاتى دا ۇنەمدەلەدى. وسىنىڭ بارلىعىن ءالى دە جەتىلدىرۋ كەرەك. حالىق ءتيىستى قىزمەتتى جىلدام ءارى ساپالى تۇردە الۋى ءتيىس. ماسەلەن، قازىرگى كەزدە ءبىز قازپوشتا ارقىلى قۇجاتتاردى ۇيگە جەكىزۋ قىزمەتىن دايارلاپ جاتىرمىز»، - دەدى ابايەۆ بۇگىن جۋرناليستەرگە بەرگەن سۇحباتىندا.
ايتا كەتەيىك، بۇگىن استانادا «ەلەكتروندى ۇكىمەت» سالاسىنداعى قازاقستان - كورەيا ىنتىماقتاستىعىن دامىتۋ بويىنشا اشىق سەمينار باستالدى. وتكەن جىلى ق ر اقپارات جانە كوممۋنيكاتسيالار ءمينيسترى داۋرەن ابايەۆ كورەيانىڭ پۋسان قالاسىنا جاساعان ساپارى بارىسىندا ەكىجاقتى ارىپتەستىك تۋرالى مەموراندۋمعا قول قويعان بولاتىن. اتالعان قۇجات ەلەكتروندى ۇكىمەتتى دامىتۋ ماسەلەلەرىنە ارنالعان حالىقارالىق فورۋمدا راسىمدەلگەن. «بۇگىنگى سەمينار ءبىزدىڭ العاشقى شارامىز بولىپ سانالادى. ءبىز ونىمەن شەكتەلمەيمىز. ەلەكتروندى ۇكىمەتتى دامىتۋ سالاسىنداعى ارىپتەستىگىمىزدى ودان ءارى تەرەڭدەتەتىن بولامىز»، - دەيدى ابايەۆ.
اۆتور: ارمان اسقاروۆ
