قازاقستاننىڭ عالىمدارى جاۋىنگەرلىك روبوتتى قۇراستىرۋدا
بۇل تۋرالى بۇگىن ماجىلىستەگى ۇكىمەت ساعاتىندا ق ر قورعانىس ءمينيسترى ساكەن جاسۇزاقوۆ ءمالىم ەتتى، دەپ حابارلايدى قازاقپارات.
ونىڭ سوزىنە قاراعاندا، اسكەري عىلىمدى دامىتۋ ءۇشىن ق ر تۇڭعىش پرەزيدەنتى - ەلباسى اتىنداعى ۇلتتىق قورعانىس ۋنيۆەرسيتەتىندە ەكى عىلىمي-زەرتتەۋ ينستيتۋتىن قامتيتىن اسكەري-عىلىمي ورتالىق قۇرىلدى.
ينستيتۋتتار جاۋىنگەرلىك ونەر مەن پەرسپەكتيۆالى قارۋ تۇرلەرىن زەرتتەۋمەن اينالىسادى. اتاپ ايتقاندا، ورتالىقتىڭ ءبىرىنشى جوباسى اياسىندا ۇشقىشسىز اۋە اپپاراتىنىڭ العاشقى ۇلگىسى جاسالدى.
«مەن ونىمەن تانىسىپ شىقتىم. وسىعان بايلانىستى جاۋىنگەرلىك سىناقتاردى جۇرگىزۋ تۋرالى تاپسىرما بەردىم. ياعني ولار تاجىريبە جۇزىندە ناقتى اپپاراتتاردى شىعارا الادى. قازىرگى كەزدە عالىمدار جاۋىنگەر روبوت جوباسى بويىنشا جۇمىس ىستەپ جاتىر. مەنىڭ ويىمشا، قارجىلاندىرۋدى ەسكەرە وتىرىپ، وسى ەكى باعىتتاعى جۇمىستاردى ولار ءساتتى اياقتايتىن بولادى»، - دەپ تۇيىندەدى ءسوزىن جاسۇزاقوۆ.
اۆتور: رۋسلان عابباسوۆ
