اكادەميك بۋرابايدى ۇزاق ءومىر ءسۇرۋدىڭ «كوگىلدىر ايماعىنا» اينالدىرۋدى ۇسىندى
«ءومىر سۇرۋگە ىڭعايلى جانە ۇزاق جاساۋعا لايىقتى جەرلەردى «كوگىلدىر ايماق» دەپ اتاپ كەتكەن.
الەمدە ءتورت تانىمال «كوگىلدىر ايماق» بار. وندا بارلىق جاعدايلار جاسالعان. مۇنداي ايماقتارعا ءبىرقاتار تالاپتار قويىلادى. وعان قورشاعان ورتا، ساۋدا جاساۋ مۇمكىندىگى، ءبىلىم الۋ جانە جۇمىس جاساۋعا ەڭ ىڭعايلى جاعدايلار جاساۋ كىرەدى. مەن ءبىزدىڭ پرەزيدەنت نۇرسۇلتان نازاربايەۆقا وسىنداي «كوگىلدىر ايماقتارعا» قازاقستاندا ەڭ الدىمەن بۋراباي لايىق ەكەندىگىن ايتتىم»، - دەدى تورەگەلدى شارمانوۆ «قازاقپارات» تىلشىسىنە بەرگەن سۇحباتىندا.
«ءبىراق قازاقستاندا «كوگىلدىر ايماقتارعا» الماتى وبلىسىنىڭ جەتىسۋ ءوڭىرى، ەلدىڭ شىعىسى مەن بۋراباي كىرە الادى. بۇل جەرلەردى «كوگىلدىر ايماقتارعا» قويىلاتىن حالىقارالىق تالاپتارعا ساي ەتۋ كەرەك. كوپتەگەن تالاپتار قازىردىڭ وزىندە بار - ينفراقۇرىلىم، جاقسى جولدار بار، اۋاسى تازا، قورشاعان ورتا كورىكتى، استانامىز جاقىن ورنالاسقان. تاعى نە كەرەك؟»، - دەپ جالعادى ءسوزىن اكادەميك.
الەمدە ادامدارى ۇزاق جاسايتىن «كوگىلدىر ايماقتار» بار، ولاردىڭ قاتارىندا يتالياداعى ساردينيا ارالى، كوستا-ريكاداعى نيكويا تۇبەگى، جاپونيانىڭ وكيناۆا پرەفەكتۋراسى جانە كاليفورنياداعى لوما ليندا قاۋىمداستىعى بار.
ولار ساياحاتتانۋشى ءارى جازۋشى دەن بيۋتتنەردىڭ ارقاسىندا تانىمال بولدى. ونىڭ National Geographic جۋرنالىندا جاريالانعان «ۇزاق جاساۋدىڭ قۇپيالارى» اتتى ماقالاسىنان كەيىن، باسىلىم ۇزاق ءومىر ءسۇرۋدىڭ قۇپيالارى مەن سىرلارىن ودان ءارى اشۋ ءۇشىن ونىڭ وسى ايماقتارعا بىرنەشە مارتە ەكسپەديتسيا ۇيىمداستىرۋىنا قاراجات بولگەن.
اۆتور: جاسۇلان جولدىبايەۆ
