قاراعاندىلىق وقۋشىلار جاساندى ساۋساق ويلاپ تاپتى

ونىڭ قىزمەتى قاراپايىم، ءارى وتە قولايلى. اسىرەسە، مۇمكىندىگى شەكتەۋلى جاندار ءۇشىن بۇل تاپتىرماس پروتەز. ونەرتاپقىشتار ەندى العاشقى تۋىندىلارىن ساۋساعى جوق ءبۇلدىرشىننىڭ بىرىنە سىيعا تارتقالى وتىر. بالالار اۋەلى جاساندى قولدىڭ جوباسىن كومپيۋتەرگە سالادى. سوسىن ونى 3-د پرينتەرىندە قۇيىپ، كەيىن بولشەكتەردى ءبىر- بىرىنە قوسىپ، جينايدى.

ال پروتەز قولدىڭ بىلەزىك بۋىنىنا بەكتىلەدى. وسىلايشا بۇلشىق ەتتىڭ قوزعالىسىمەن ساۋساقتار بۇگىلەدى. قازىر وقۋشىلار ونىڭ باسقا ءتۇرىن جاساپ جاتىر. «قازىرگى جاساپ جاتقان قول بۇدان دا جاقسى بولادى جانە ول كىشكەنە باسقا تاسىلمەن جاسالعان. وعان باسقا ماتەريالدار كەرەك جانە ول كادىمگى ادامنىڭ ساۋساقتارىنداي بولادى، ءارى جاقسى قوزعالاتىن بولادى»، - دەيدى قازاق- تۇرىك ليتسەيىنىڭ وقۋشىسى الىشەر سماعۇلوۆ. وقۋشىلار بۇل ونەرتابىستارىن «بيونيكا» باعدارلاماسى ارقىلى جۇزەگە اسىرعان.

ال مەكتەپ اكىمىشىلىگى الداعى ۋاقىتتا بالالارعا «قولدانبالى نەيروفيزيولوگيا» كۋرسىن وقىتۋدى دا كوزدەپ وتىر. ماسكەۋلىك عالىمدار ونلاين جۇيەسىندە ءدارىس وقيدى. سونداي-اق ليتسەيدە جاڭا زەرتحانا اشۋ جوسپاردا. «الداعى ۋاقىتتا وسى مەحانيكالىق جاعدايدا جۇمىس ىستەيتىن پروتەزدەردىڭ نەيرومودەلدەۋ ارقىلى، كادىمگى ميدىڭ سيگنالدارى ارقىلى قولداردىڭ وزىنەن- ءوزى جۇمىس ىستەۋىن جاساعىمىز كەلەدى. الداعى ۋاقىتتا وسىعان بايلانىستى نەيرومودەليست لابوراتورياسىن ساتىپ الامىز، وسىمەن جۇمىس جاسايتىن بولامىز»، - دەپ اتاپ ءوتتى قازاق- تۇرىك ليتسەيىنىڭ ديرەكتورى قازىبەك ەلۋبايەۆ.

ليتسەي ىشىندە قايىرىمدىلىق كلۋبى جۇمىس ىستەيدى. كەلەشەكتە ونىڭ مۇشەلەرى پروتەزگە مۇقتاج جانداردى ىزدەپ تاۋىپ، جاساندى ساۋساقتى سىيعا تارتپاقشى. ال دارىندى جاستار العاشقى ونەرتابىستارىن تاپسىراتىن بالانى تاپتى. ونىڭ ەكى ساۋساعى عانا بار. قازىر پروتەزدىڭ سوڭعى جۇمىستارى قالدى.

دەرەككوز: «حابار 24» تەلەارناسى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى