دوسى «ديماش ورىسشا بىلمەگەندىكتەن قازاقشا سويلەيدى» دەپ سىنايتىندارعا جاۋاپ بەردى
سونداي-اق، الپامىس «ديماش ورىسشا بىلمەگەندىكتەن تەك قازاقشا سويلەيدى» دەپ سىنايتىندارعا ءوز جاۋابىن بەردى.
31- ارنانىڭ «ايتا بەرسىن» باعدارلاماسىنا بەرگەن سۇحباتىندا ديماشتىڭ تويدان الاتىن گونورارىنىڭ اسپانعا شارىقتاپ كەتكەنىن جوققا شىعاردى.
«توي ۇيىمداستىرۋشىلارى، باسقا دا ادامدار ءبىز ءۇشىن ويلاپ قويىپتى. ديماشتىڭ تويعا شىعۋعا ۋاقىتى دا، مۇمكىندىگى دە جوق. جۇمىس كەستەسى وتە تىعىز... ديماشتىڭ گونورارى تۋرالى ايتىپ جاتقان ادامداردى تۇسىنبەيمىز جانە بۇل سۇراقتارعا جاۋاپ بەرە المايمىز. سەبەبى ءوزىمىز بىلمەيمىز، ءوزىمىز ويلانعان جوقپىز»، - دەگەن الپامىس ءشارىموۆ ديماشتىڭ الداعى ۋاقىتتا تويعا شىقپايتىنىن ايتتى. سەبەبى ونىڭ الداعى جۇمىس كەستەسى ءبىر جىلعا جوسپارلانىپ قويىپتى.
بۇدان وزگە، الپامىس ديماشتى تەك انا تىلىندە سويلەگەنى ءۇشىن سىناعاندارعا جاۋاپ بەردى.
«ديماش - قازاقستاندا دۇنيەگە كەلگەن قازاق ۇلتىنىڭ بالاسى. ول ءوز ەلىنىڭ ءتىلىن، مارتەبەسىن، تۋىن بيىككە كوتەرەمىن دەگەن ۇل بولماسا قازاق تىلىندە ءان ايتپاس ەدى، 100 پايىز قازاق تىلىندە سۇحبات بەرمەس ەدى. كەي جەرلەردە «ديماش باسقا ءتىلدى بىلمەگەندىكتەن تەك قازاق تىلىندە سويلەيدى» دەپ جازىپ جاتىر ەكەن. ولاي ەمەس. ديماشتىڭ ورىسشاسى وتە كەرەمەت. اعىلشىن تىلىندە 100 پايىز جاقسى سويلەيدى دەي المايمىن، ءبىراق ءوز ويىن جەتكىزە الادى جانە تۇسىنەدى.
ءبىراق ديماشتىڭ قازاق تىلىندە سويلەۋى، قازاقتىڭ كيىمىمەن شىعىپ، قۇرمانعازىنىڭ «اداي» كۇيىن ورىنداۋى، «دايديداۋدى» ورىنداۋى، جۇرگەن جەرىندە بارلىق فاناتتارىنا قازاق ءتىلىن ۇيرەتۋى، «اباي جولىن» ، قازاق اقىندارىنىڭ ولەڭدەرىنىڭ ناسيحاتتاۋى - قازاق ۇلتىنىڭ سۇيەتىنىنىڭ بەلگىسى. وسىنى كورىپ تۇرىپ، سۇراق قوياتىن ادام بولسا، وندا ول كىسىنىڭ وزىنەن سۇراۋ كەرەك شىعار»، - دەپ ءتۇسىندىردى الپامىس.
دوسى ديماشتىڭ الداعى جوسپارلارىمەن ءبولىستى.
«ول، ارينە، ءارى قاراي دا الەمگە قازاق ءانىن پاش ەتۋگە دايىن. ەۋروپاعا، ا ق ش- قا كوپتەگەن شاقىرتۋلار ءتۇسىپ جاتىر. مايكل دجەكسون امەريكادا دۇنيەگە كەلسە دە، ول الەم ءۇشىن جارالعان مۋزىكانت. ول امەريكادا تۋىلعان دەپ ەشكىم ايتپايدى. ءوزىم ويلايمىن، ارينە، ديماش - قازاق ءانشىسى، ول قازاقشا سويلەيدى، قازاقشا ءان ايتادى، ءبىراق ول الەم ءانشىسى. ونى قىزعاناتىن بولساڭىزدار، باسقا پلانەتالاردان قىزعانىڭىزدار. جەرگە كەلگەن ديماشتىڭ ميسسياسى بار سياقتى. ول ميسسياسى - الەمدى مۋزىكاسىمەن تەربەۋ، الەمگە مۋزىكاسىن تانىتۋ. سىزدەر ديماشتىڭ مۋزىكاسىنىڭ 20-30 پايىزىن تىڭدادىڭىزدار. ءبىراق ونىڭ ءالى ايتاتىنى بار»، - دەپ تۇيىندەدى الپامىس.
