وڭتۇستىك قازاقستاندا «عاسىر جاساعان انا» اكسياسى باستاۋ الدى
سايرام اۋدانىنىڭ جاستارى وسى شارا اياسىندا اۋدانداعى ۇزاق جاساعان انالاردىڭ بارلىعىنا قۇرمەت كورسەتپەك، دەپ حابارلايدى «قازاقپارات ح ا ا ءتىلشىسى.
اناعا قۇرمەت ءبىر كۇنمەن شەكتەلمەيدى. وسىنى قاعيدا ەتكەن سايرامدىق جاستار ەرەكشە اكسيانى قولعا الدى. جاستار ورتالىعى باستاماشى بولعان شارا اياسىندا اۋدانداعى جاسى جۇزدەن اسقان انالاردىڭ ءتىزىمى جاسالىپ وتىر. ەندى مۇنداي قاريالاردىڭ تۋعان كۇندەرىن نازاردان تىس قالمايتىن بولادى.
جەرگىلىكتى بيلىك وكىلدەرى مەن جاستار عاسىر جاساعان اجەيلەردى قۇتتىقتاپ، بارلىعىنا اۋدان اكىمىنىڭ قۇتتىقتاۋ حاتى مەن ارنايى سىيلىقتارىن تاپسىراتىن بولادى.
بۇل جاستاردى ۇلكەندى قۇرمەتتەۋگە ۇگىتتەپ، قارتتىق قامىتىن كيگەن جانداردىڭ كوڭىلىن كوتەرۋگە ىقپال ەتەرى ءسوزسىز.
اكسيانى ۇيىمداستىرۋشىلار بۇگىن العاشقى قارتتى قۇتتىقتاپ شىقتى. سيقىم اۋىلىنىڭ تۇرعىنى جۇماقىز اپا بۇگىن 104- كوكتەمىن قارسى العان بولاتىن.
«ۇزاق جاساعان انانى قۇتتىقتاۋعا ءوزىنىڭ ءۇرىم-بۇتاعىنان بولەك، جاستار دا كەلدى. تۋعان كۇن يەسىنە اۋدان اكىمىنىڭ سالەمدەسى جەتكىزىلدى. ءوز كەزەگىندە 100 جاساعان كەيۋانا قۇتتىقتاپ كەلگەندەردىڭ بارلىعىنا العىس ايتىپ، اق باتاسىن بەردى»، - دەيدى سايرام اۋدانى اكىمىنىڭ ورىنباسارى ماديار ورازاليەۆ.
ايتا كەتەيىك، اۋدانداعى انالاردى ارداقتاۋ شاراسى جىل سوڭىنا دەيىن جالعاسادى.
