ساياحات كەزىندە قۇجاتىڭىزدى ۇرلاتىپ الساڭىز نە ىستەۋ كەرەك؟
اياقاستىنان باسىڭىز داۋعا قالۋى مۇمكىن. سولاردىڭ ءبىرى قۇجاتتاردىڭ جوعالۋى نەمەسە ۇرلاپ كەتۋى. ال مۇنداي جاعدايدا نە ىستەۋ كەرەك؟
ساياحاتقا شىقپاي تۇرىپ نە ىستەۋ كەرەك؟
الدىمەن قۇجاتتىڭ بىرنەشە كوشىرمەسى بولعان ءجون. كەمىندە ۇشەۋىن نوتاريۋستان بەكىتتىرىپ الۋ كەرەك. وعان تولەنەتىن قارجى شامامەن 1500-2000 تەڭگە. قۇجاتتى ۇرلاتىپ العان جاعدايدا نوتاريۋستان بەكىتىلگەن قۇجاتتار كونسۋلدىق مەكەمەگە جانە پوليتسياعا بەرىلەدى.
كونسۋلدىق قىزمەت پەن ەلشىلىكتىڭ ايىرماشىلىعى
ەلشىلىك - بۇل قازاقستاننىڭ ءار ەلدەگى رەسمي وكىلى. ولار ديپلوماتيالىق جانە مەملەكەتتىك تاپسىرمالاردى ورىنداۋمەن اينالىسادى. ال كونسۋلدىق جەكە تۇلعالارعا ۆيزا الۋعا كومەكتەسەدى. سوندىقتان قۇجاتىڭىزدى ۇرلاتىپ نەمەسە جوعالتىپ العان جاعدايدا كونسۋلدىق مەكەمەگە جۇگىنەسىز. ال تۋريستىك ەمەس ەلدەردە بارلىق ماسەلەنى ەلشىلىك شەشەدى.
قۇجاتتى ۇرلاتقان جاعدايدا
جەكە قۇجاتتارىڭىزدى ۇرلاتقان جاعدايدا ەلگە قايتىپ كەلۋ ءۇشىن قانداي قۇجاتتار كەرەك ەكەنىن ءبىلىپ الىڭىز. كوبىنە تۋريستەن ونىڭ جەكە كۋالىگى مەن ەكى فوتوسى تالاپ ەتىلەدى. الايدا نوتاريۋسپەن بەكىتىلگەن شەتەلگە شىعۋعا ارنالعان قۇجاتىڭىزدىڭ كوشىرمەسى مەن ۆيزا كوشىرمەسىن، جۇرگىزۋشى كۋالىگىن الىپ العان ءجون.
سونداي- اق، ساپارعا شىقپاس بۇرىن تۋريستىك ساقتاندىرۋدى راسىمدەڭىز. ساقتاندىرۋ قىزمەتىنىڭ وكىلدەرى قۇجاتىڭىزدى ۇرلاتىپ العان كەزدە كونسۋلدىقتىڭ تەلەفونىن تاۋىپ بەرۋگە، اۋدارما جانە قاجەت قۇجاتتار ءتىزىمى بويىنشا كومەكتەسەدى.
قۇجاتتى جوعالتىپ الماس ءۇشىن ونى قوناق ۇيگە تاستاپ كەتىڭىز. ونىڭ ەلدى ارالاۋ كەزىندە اسا قاجەتى جوق. ال پوليتسەيلەر تەكسەرەدى دەسەڭىز كوشىرمەسىن الىپ الىڭىز.
ەگەر ءسىز ساياحاتتاپ ءجۇرىپ قۇجاتتى جوعالتىپ الساڭىز اسسيستانسقا (ساقتاندىرۋ شارتى بويىنشا ساقتانۋشىعا ماتەريالدىق- زاتتىق، نەمەسە تەحنيكالىق، مەديتسينالىق جانە قارجىلاي كومەك كورسەتەتىن قىزمەت ءتۇرى - رەد. ) حابارلاسىڭىز. اسسيستانس كونسۋلدىققا حابارلاسىپ ولاردىڭ تالاپتارىنىڭ قانداي ەكەنىن بىلۋگە، سىزگە اۋدارماشى تاۋىپ بەرۋگە كومەكتەسەدى.
كونسۋلدىققا حابارلاسىپ قۇجاتتارىڭىزدى جوعالتقانىڭىزدى ايتىڭىز. ولاردان قازاقستانعا قايتۋ ءۇشىن كۋالىك الۋىڭىز كەرەكتىگىن حابارلاڭىز. بۇدان بولەك قاي ەلگە بارساڭىزدا كونسۋلدىقتىڭ جۇمىس ءتارتىبى قانداي ەكەنىن ءبىلىپ الىڭىز. سەبەبى ءۇندىستان سياقتى كەيبىر ەلدەردە كونسۋلدىقپەن كەزدەسۋ ءۇشىن الدىن الا جازىلۋ كەرەك بولادى. ال پاريجدە ءبارى ونلاين، كەزەكتە تۇرۋدىڭ قاجەتى جوق.
پوليتسياعا قۇجاتتىڭ جوعالعانى تۋرالى حابارلاڭىز. وزىڭىزبەن بىرگە قۇجاتتىڭ كوشىرمەسى مەن قوناق ءۇي برونىن الىپ الۋدى ۇمىتپاڭىز. تۋريستىك قالالالاردا پوليتسەيلەر قۇجاتسىز جۇرگەن تۋريستەرگە ۇيرەنىپ قالعان. سوندىقتان ولار كوپ سۇراق قويماي، قۇجاتتىڭ جوعالعانى تۋرالى انىقتاما جازۋعا كىرىسەدى. ال ەگەر ولارمەن سويلەسۋدەن قورىقساڭىز اۋدارماشىمەن جۇرگەنىڭىز ءجون.
دەرەككوزى: https://7kun.kz
