الماتىدا «قاريا» تەلەحيكاياسىنىڭ ءتۇسىرىلىمى باستالدى

بۇل تەلەحيكايادا اكە مەن بالا اراسىنداعى قارىم- قاتىناس ارقىلى بۇگىنگى قوعامداعى كەلەڭسىز جايت بەينەلەنەدى. فيلمنىڭ كەيىپكەرى ەربول ەگدە تارتقان اكەسىنەن باس تارتادى. سول سەبەپتى كارتينانىڭ بىرنەشە كورىنىسى قارتتار ۇيىندە تۇسىرىلگەن.

دوسجان جانبوتايەۆ، قازاقستاننىڭ حالىق ءارتىسى:

 - ءبىرىن- ءبىرىن سىيلاماۋ. تەلەحيكايا ادامداردىڭ اراسىنداعى قارىم- قاتىناستىڭ، اداميلىق پەن ادامگەرشىلىكتىڭ نەلىكتەن جوعالا باستاعانى تۋرالى سۇراققا جاۋاپ بەرەتىن سياقتى.

تەلەحيكايادا باۋىرجان قاپتاعاي، ەربولات توعىزاقوۆ، گۇلنار بايبوسىنوۆا جانە الماس شاياحمەتوۆ سىندى اكتەرلەر وينايدى. كەيبىر ەپيزودتىق رولدەر مەن كوپشىلىك كورىنىستەرگە قارتتار ءۇيىنىڭ تۇرعىندارى تارتىلعان.

مۇقاش جادىقوۆ، №3 ارناۋلى الەۋمەتتىك قىزمەتتەر كورسەتۋ ورتالىعىنىڭ تۇرعىنى:

 - مەن كينوعا ءتۇسۋ تۋرالى جاسىمنان ارمانداپ ەدىم. تاعدىردىڭ تالكەگىمەن ومىردە نەشە ءتۇرلى جاعداي بولعاندىقتان، بۇل ارمانىم ورىندالماي قالعان ەدى. ەندى مىنا تەلەحيكايادا مۇگەدەك اقساقالدى سومدايمىن.

فيلم يدەياسىنىڭ اۆتورى جانە رەجيسسەرى -  اسقات مۇساباي. بۇل جاس رەجيسسەردىڭ دەبيۋتتىك جۇمىسى بولدى.

 اسقات مۇساباي، «قاريا» تەلەحيكاياسىنىڭ رەجيسسەرى:

 - تاقىرىپ جاعىنان وتە اۋىر تەلەحيكايا بولايىن دەپ تۇر. ادامعا وي سالادى. ءبىزدىڭ ماقساتىمىز وسى كارتينانى كورگەننەن كەيىن ەڭ كەمى ءبىر وتباسى بولسىن، ءوزىنىڭ اكە- شەشەسىن قارتتار ۇيىنە اپارۋ ويىنان باس تارتسا ەكەن. سونىڭ ءوزى ءبىز ءۇشىن ۇلكەن جەتىستىك بولار ەدى.

ءتۇسىرىلىم جۇمىستارى ەكى ايعا سوزىلادى. جوبا اۆتورلارىنىڭ ايتۋىنشا، تۋىندى 12 سەريادان تۇرادى. «قاريا» تەلەحيكاياسى «حابار» ارناسىنان كۇزدە كورسەتىلەدى.

اۆتورلارى: ۇلان نارىنبەك، مۇحيت قۇدىقبايەۆ

http://khabar.kz/kz/news

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى