ب ۇ ۇ ۆەنەسۋەلاداعى جاعدايعا الاڭداۋلى
حالىقارالىق قاۋىمداستىق وكىلدەرى جەرگىلىكتى بيلىك پەن وپپوزيتسيانى ديالوگ جۇرگىزۋ ارقىلى ءبىر مامىلەگە كەلۋگە شاقىردى.
«ب ۇ ۇ ۆەنەسۋەلادا جاڭا قاقتىعىستار تۋىنداۋى مۇمكىن دەپ قاۋىپتەنىپ وتىر. مۇنداي جاعدايدى بولدىرماۋ ءۇشىن ۇكىمەت پەن وپپوزيتسيا بيلىك تارماقتارى اراسىندا وكىلەتتىكتى ءبولۋ، ادام قۇقىقتارى مەن ەلدەگى الەۋمەتتىك- ەكونوميكالىق احۋالعا قاتىستى كەلىسسوزدەر جۇرگىزۋى قاجەت»، - دەيدى ب ۇ ۇ باس حاتشىسىنىڭ باسپا ءسوز قىزمەتىنىڭ جەتەكشىسى ستەفان ديۋجارريك.
جوعارعى سوت - ەلدەگى زاڭ شىعارۋشى ورگان ۇلتتىق اسسامبلەيانىڭ بيلىگىن شەكتەۋ تۋرالى شەشىمدى ءساۋىردىڭ باسىندا قابىلداعان بولاتىن. الايدا ارتىنشا ونى كەرى قايتارىپ العانىمەن، ۆەنەسۋەلادا جاپپاي ەرەۋىلدەر تولاس تاپپادى. كوپ جاعدايدا نارازىلىق شاراسى پوليتسەيلەرمەن قاقتىعىسقا ۇلاسىپ جاتىر. سوڭعى ەكى كۇن ىشىندە تارتىپسىزدىكتەرگە بايلانىستى 585 ادام قاماۋعا الىنعان. سونداي- اق، 3 ادام قازا تاۋىپ، 220-دان استامى جارالاندى. ەلدەگى احۋالدىڭ ۋشىعا تۇسۋىنە بايلانىستى بۇعان دەيىن پرەزيدەنت نيكولاس مادۋرو قارۋلى كۇشتەردى جوعارى دايىندىق جاعدايىنا كوشىرۋگە بۇيرىق بەردى.
