روزا رىمبايەۆا وزىمەن سۋرەتكە تۇسكىسى كەلەتىندەردى «ادەپسىز ءارى بەتپاق» دەپ اتادى
ءانشىنىڭ اشۋىنا تيگەن نارسە - كورەرمەندەردىڭ بەتپاقتىعى مەن ادەپسىزدىگى.
سوعان قاراماستان روزا رىمبايەۆا ەشقاشان جۇلدىز اۋرۋىمەن اۋىرماعانىن مالىمدەدى.
«ەشقاشان جۇلدىز اۋرۋىمەن اۋىرعان ەمەسپىن. مەن تەك وزىمە كاسىبي مامان رەتىندە وتە قاتاڭ قارايمىن جانە اينالاداعىلار ءوز ءىسىن تىڭعىلىقتى اتقارسا دەيمىن. مىسالى، ءتۇسىرىلىم ۋاقىتى اۋىسىپ كەتتى دەلىك. ەگەر مەن ۋاقىتىندا كەلىپ، ستۋديا دايىن ەمەس نەمەسە وپەراتور، رەجيسسەرلەر كەلمەگەن بولسا، مەن ورنىمنان تۇرىپ: «سىزدەر مەنى تاڭەرتەڭگى ۋاقىتقا شاقىرعانسىزدار. مەن كەلدىم، ال سىزدەر جوقسىزدار. ايىپ ەتپەڭىزدەر، مەن كەتتىم»، - دەيمىن دە كەتىپ قالامىن»، - دەپ ءتۇسىندىردى ول.
حالىق ءارتىسى اشۋلانسا، ءوز ءىسىن دۇرىس اتقارماعان جانعا ايقايلاپ تا بەرە الادى.
«مەن دە ادام بالاسىمىن. مەنىڭ دە سابامنان شىعىپ كەتەتىن كەزدەرىم بولادى. سونداي-اق، مەنىمەن سۋرەتكە تۇسكەندى ۇناتپايمىن. ويتكەنى ەل روزا رىمبايەۆانىڭ ءوزىن ەمەس، روزا رىمبايەۆامەن بىرگە ءوزىن سۋرەتكە ءتۇسىرىپ قالۋدى قالايدى. كەيدە قايدا قاراۋ كەرەكتىگىمدى نۇسقاپ، ءتىپتى، كادرعا ءتۇسۋ ءۇشىن موينىمدى بۇرىپ الاتىندار بولادى. اسىرەسە، ءان ايتىپ تۇرعان كەزدە وسىنداي جاعداي ورىن السا، شىداي المايمىن. جانىما كەلىپ قۇشاقتايدى، ودان قالسا سۋرەتكە تۇسۋگە ماجبۇرلەيدى. بۇل دەگەنىڭىز كورەرمەننىڭ ادەپسىزدىگى ءارى بەتپاقتىعى. وسى نارسە اشۋىمدى كەلتىرەدى. ونداي كەزدە كورەرمەننىڭ بەتىن قايتارىپ نەمەسە ءان ايتپاي كەتىپ قالۋىم مۇمكىن. ەڭ سوراقىسى، ادامدار نەلىكتەن مەنىڭ مۇنداي قادامعا بارعانىمدى تۇسىنبەستەن، جۇلدىز اۋرۋىنا شالدىققان دەپ ايىپتايدى»، - دەيدى رىمبايەۆا.
