كەز كەلگەن شەنەۋنىك «اشىق ديالوگ» حابارىنا قاتىسا الادى - اقپارات ءمينيسترى
«كەشە «اشىق ديالوگ» باعدارلاماسىنىڭ 5- شىعارىلىمىندا ميحايل دوروفەيەۆپەن وتكەن اپتانىڭ بارىنشا وزەكتى تاقىرىبى - ەلدەگى سۋ تاسقىنى جاعدايىن، ەكسپوعا بيلەتتەردى ءماجبۇرلى ساتۋ، تەڭگەنىڭ ىقتيمال ريەۆالۆاتسياسى جايىندا تالقىلاندى»، دەپ جازدى مينيستر د. ابايەۆ ءوزىنىڭ Facebook-تاعى پاراقشاسىنا.
حابار ءار بەيسەنبى سايىن ساعات 20.50 -دە باستالىپ، 10 مينۋتقا سوزىلادى. ول حاباردىڭ يدەياسى كەڭىنەن قوعام تالقىسىنا تۇسكەن (اسىرەسە الەۋمەتتىك جەلى ارقىلى) ماسەلەلەر بويىنشا مەملەكەتتىك ۇستانىمدى جەتكىزۋ ەكەنىن اتاپ ءوتتى.
«اشىق ديالوگ» حابارىنىڭ العاشقى شىعارىلىمىنان كەيىن ماعان باسقا مينيسترلىكتەر مەن رەسمي ورگاندار قۇزىرىنداعى ماسەلەلەردى ءتۇسىندىرۋ جاۋاپكەرشىلىگىن نەگە وزىڭىزگە الاسىز دەگەن سۇراق قويىلدى. وسى ورايدا بەلگىلى ءبىر دەڭگەيدە بۇل مەنىڭ كاسىبي مىندەتىم ەكەندىگىن، ەكىنشى جاعىنان، ءبىز بۇل الاڭدى قوعامدى تولقىتىپ وتىرعان تاقىرىپتاردى ايتۋعا ءازىر، ءوز سالاسىنداعى ىسكە اسىرىلىپ جاتقان ساياساتتىڭ ءمانىن تۇسىندىرگىسى كەلەتىن كەز كەلگەن رەسمي تۇلعاعا ۇسىنۋعا دايىن ەكەنىمىزدى ايتقىم كەلەدى»، - دەدى مينيستر.
