قۇراننىڭ ارقاسىندا قۇجاتتار ورتتەن امان قالعان
وبلىستىق توتەنشە جاعدايلار دەپارتامەنتى باسپا ءسوز قىزمەتىنىڭ حابارلاۋىنشا، ءورت تۋرالى ساعات 15.00 دە حابارلاما تۇسكەن.
«جەكە قۇرامنىڭ 15 ءورت ءسوندىرۋشىسى قىزىل جالىنمەن 1,5 ساعات بويى ارپالىستى. سالدارىنان ءۇي جيھازدارى، زاتتار مەن ەلەكترونيكا قۇرالدارى جانىپ كەتتى. قازىرگى ۋاقىتتا كەلتىرىلگەن شىعىن كولەمى مەن وقىس وقيعانىڭ سەبەبى انىقتالىپ جاتىر. الدىن الا بولجام بويىنشا ءورت توق سىمدارىنىڭ تۇيىقتالۋىنان ورىن العان. ءتىلسىز جاۋ 18 شارشى مەترلىك اۋماقتى جالمادى» ، - دەيدى ۆەدومستۆونىڭ باسپا ءسوز قىزمەتىنىڭ مامانى مارال ساعىنايەۆا.
پاتەر يەسى ناتاليا بايمۇراتوۆانىڭ ايتۋىنشا، ءورت بولعان كەزدە ۇيدەگىلەردىڭ بارلىعى سىرتتا بولعان. بۇگىندە 53 جاستاعى ازاماتشا ءبىر بولمەلى پاتەردە قىزى جانە ەكى جيەنىمەن تۇرادى.
«ابىروي بولعاندا، پاتەردە ەشكىم بولمادى. قىزىل جالىن سالدارىنان ءۇيىمىز تۇگى قالماي جانىپ كەتتى. قاڭىراعان قابىرعالار عانا قالدى. جيەندەرىمنىڭ كۇندەلىكتى كيەتىن كيىمى دە جوق. ولاردى مەكتەپكە قالاي جىبەرەمىن؟ ۋايىمداپ وتىرمىن. قولىمدا بولعان قاراجاتقا ۋاقىتشا پاتەر جالدادىق» ، - دەيدى ناتاليا بايمۇراتوۆا.
ءبىر قىزىعى، ناتاليا بەكمۇراتوۆانىڭ پاتەرىندە بولعان الاپات ورتتەن قۇران كىتابى عانا امان قالىپتى.
«قۇراننىڭ ىشىندە جيەندەرىمنىڭ تۋۋ تۋرالى كۋالىكتەرى بولعان ەدى. قاسيەتتى كىتاپ جانعان جوق» ، - دەيدى پاتەر يەسى.
ايتا كەتەيىك، ورتەنىپ كەتكەن پاتەر بۇرىن جاتاقحانا بولعان كوپقاباتتى ۇيدە ورنالاسقان. توتەنشەلىكتەردىڭ ايتۋىنشا، ءورت قاۋىپسىزدىگى ساقتالمايتىن وسى تەكتەس نىسانداردا تۇرۋ اسا قاۋىپتى. كەڭەستىك كەزەڭدە سالىنعان نىسانداردا ءورت وقيعالارى جيىلەپ كەتكەن. وسىنى قاپەرگە العان توتەنشەلىكتەر تۇرعىندار اراسىندا ءورت قاۋىپسىزدىگى بويىنشا ءتۇسىندىرۋ جۇمىستارىن جۇرگىزىپ، ءار پاتەردى ارالاپ شىعۋدى ادەتكە اينالدىرعان. جالپى، وبلىس ورتالىعىندا جىلىتۋ كەزەڭى باستالعالى بەرى وڭىردە 120 دان استام وقىس وقيعا تىركەلگەن. سالدارىنان تۇرعىندارعا كەلتىرىلگەن شىعىن كولەمى 15 ميلليون تەڭگەدەن اسىپ جىعىلعان. وكىنىشكە قاراي، گازدان ۋلانىپ، ورتتەن كوز جۇمعاندار سانى ارتا تۇسكەن. قاراپايىم ءورت قاۋىپسىزدىگى ەرەجەلەرىن ساقتاماۋ سالدارىنان 15 ادام قايتىس بولعان.
اقمارجان ادىلبەك
Baq.kz
