الماتى وبلىسىندا بالقاش كولىن ساقتاپ قالۋ ماقساتىندا جۇمىستار جالعاسۋدا
بالقاش كولىنىڭ نەگىزگى بولىگىن ىلە مەن قاراتال وزەندەرى قۇرايدى. كولدى قۇتقارۋدىڭ باستى شارالارى دا وسى وزەندەردىڭ ماڭىندا جۇرگىزىلۋدە. وسى ورايدا، الماتى وبلىسى اتالمىش وزەندەردىڭ ارنالارىن قۇم- قايراڭنان تازالاۋ مەن ءتۇبىن تەرەڭدەتۋ جۇمىستارىنا ەرەكشە نازار اۋدارىپ وتىر.
بۇل ءوز كەزەگىندە بالقاشتىڭ تۇتاس ەكولوگيالىق جۇيەسىنە وڭ اسەرىن تيگىزىپ، سۋ قورىن مولايتۋمەن قاتار فلوراسى مەن فاۋناسىن ساقتاپ قالۋعا، بالىق شارۋاشىلىعىن قايتا جانداندىرۋعا سەپتىگىن تيگىزۋدە. ماسەلەن، ىلە وزەنىنىڭ بالقاش اۋدانى تۇسىنداعى تارماعىنىڭ 33,4 شاقىرىمىن تازارتۋعا بيىلعى جىلى 70,7 ميلليون تەڭگە ءبولىندى. ال قاراتال وزەنىنىڭ ارناسىن تازالاۋ جۇمىستارى ءۇشىن ارنايى قۇرىلعان «قاراتال» مەليوراتيۆتى- مەحانيكالاندىرىلعان وتريادى سوڭعى 3 جىلدا وزەننىڭ 27 شاقىرىمىن تازالاعان. تابيعي رەسۋرستار جانە تابيعاتتى پايدالانۋدى رەتتەۋ باسقارماسى باسشىسىنىڭ ورىنباسارى قانات داۋرەنبەكوۆتىڭ ايتۋىنشا، بيىلعى جىلى ىلە جانە قاراتال وزەندەرىنىڭ تارماقتارىن مەحانيكالىق تازارتۋ بويىنشا 4 جوبا ازىرلەۋگە وبلىستىق بيۋدجەتتەن 41,1 ميلليون تەڭگە ءبولىندى. قازىرگى كەزدە 1 جوبا جۇزەگە اسىرىلىپ، 3-ەۋى ەكىنشى جارتىجىلدىقتا ورىندالادى دەپ جوسپارلانىپ وتىر.
كوكتەم شىعا «بالقاش» مەليوراتيۆتى- مەحانيكالاندىرىلعان وترياد ماماندارى ىلە وزەنىنىڭ تارماعى سانالاتىن توپار وزەنىنىڭ بويىندا تازارتۋ جۇمىستارىن باستادى. بۇعان دەيىن قامىس پەن باتپاق قايراڭعا شىلانعان سۋ بالقاشقا جەتپەگەنىمەن قوسا، جايىلىپ، توپار اۋىلىن، اۋىلدىڭ شابىندىق جەرلەرى مەن جايىلىمدىق جەرلەرىن سۋ باسۋ قاۋپىن تۋدىرعان ەدى. بۇل ارنانى تازالاۋ ارقىلى اتالعان ماسەلەلەردىڭ بارلىعىنىڭ شەشىمى تابىلاتىن بولادى. بيىلعى جىلدىڭ شىلدە ايىنىڭ سوڭىنا دەيىن مەليوراتيۆتىك وترياد توپار وزەنىنىڭ بارلىق 33 شاقىرىمىن تۇگەلدەي قامتىماق. بۇگىنگە دەيىن 27 تەحنيكا جۇمىلدىرۋدىڭ ارقاسىندا وزەننىڭ 20 شاقىرىمى تازارتىلىپ ۇلگەرگەن. بۇل جۇمىس قاراشا ايىندا اياقتالادى. ودان كەيىن ىلە وزەنىنىڭ باسقا دا تارماقتارى تازارتىلاتىن بولادى.
وبلىستىق تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ ءبولىم باسشىسى نۇرلان شاياحمەتوۆتىڭ ايتۋىنشا، بالقاشتى قۇتقارۋعا باعىتتالعان سوڭعى جىلدارداعى جۇمىستاردىڭ ناتيجەسىندە 15 مىڭ شارشى شاقىرىم جايىلىمدىق جەر شارۋالاردىڭ يگىلىگىنە قايتادان قىزمەت ەتە باستاعان. وعان قوسا بالقاش كولىندەگى بالىق اۋلاۋ دەڭگەيى بىرنەشە ەسەگە ارتقان. جالپى سوڭعى ون ەكى جىلدا ىلە مەن قاراتال وزەنى اڭعارلارىنىڭ 641 شاقىرىمى تازارتىلدى. بۇل ماسەلە وبلىس باسشىلىعىنىڭ تۇراقتى باقىلاۋىندا.
اۆتور: سامال قابىشيەۆا
