قازاقستان كولىكتەرى قىتايعا ەكسپورتتالدى
بۇل تۋرالى بۇگىن ورتالىق كوممۋنيكاتسيالار قىزمەتى الاڭىندا «قاز اۆتو پروم» قازاقستان اۆتوموبيل سالاسىنىڭ كاسىپورىندارى وداعىنىڭ باسقارما ءتوراعاسى ولەگ الفەروۆ ءمالىم ەتتى.
«ەلدەگى اۆتوكولىك ساتىلىمىنىڭ جانە شىعارىلىمىنىڭ ەكى جىلدىق قۇلدىراۋىنان كەيىن 2017 -جىلدىڭ 1 -توقسان قورىتىندىسى پوزيتيۆتى جاڭالىقتارعا تولى. قازاقستانداعى اۆتوموبيلدەردى شىعارۋ كولەمى ءۇشىنشى اي قاتارىنان ءوسىپ كەلەدى، ساتىلىمدار ەكى توقسان بويى ارتتى. وتكەن جىلى ەلىمىزدەگى ساتىپ الۋشىلاردىڭ 19 پايىزى عانا قاز اۆتو پروم ۇسىنىسىن قابىلداعان ەدى، ال بۇگىندە ءاربىر ءۇشىنشى ساتىپ الۋشى قازاقستاندا شىعارىلعان كولىكتى تاڭدايدى»، - دەدى ولەگ الفەروۆ.
سونىمەن بىرگە، و. الفەروۆ قازاقستاندىق زاۋىتتاردىڭ ەكسپورتتىق جاعدايىنا شولۋ جاساپ ءوتتى.
«جىل باسىنان بەرى «ازيا اۆتو» زاۋىتى شىعارعان كولىكتەردىڭ 7 پايىزى نەمەسە 204 داناسى قىتايعا ەكسپورتتالدى. ارينە، قىتاي - تارتىمدى سىرتقى نارىقتاردىڭ ءبىرى. ءبىراق ونداعى باج سالىعى، تاريفتىڭ جوقتىعى كەدەرگى بولسا دا، «ازيا اۆتو» زاۋىتى قىتاي نارىعىنا 204 دانا اۆتوكولىك جىبەرىلدى. سونداي- اق، 2016-2017 -جىلدارى قىرعىزستان مەن تۇرىكمەنستان نارىقتارىنا قازاقستاندىق اۆتوكولىكتەردىڭ پيلوتتى پارتيالارى جەتكىزىلدى. بىرىككەن اراب امىرلىكتەرىنىڭ نارىعىنا دا «لادا» جول تالعامايتىن كولىكتەرى قويىلدى»، - دەپ اتاپ ءوتتى «قاز اۆتو پروم» بىرلەستىگىنىڭ باسقارما ءتوراعاسى.
ايتا كەتەيىك، بۇگىن ورتالىق كوممۋنيكاتسيالار قىزمەتى الاڭىندا «قازاۆتوپروم» قازاقستاننىڭ اۆتوموبيل سالاسىنىڭ كاسىپورىندار وداعى 2017 -جىلدىڭ 1 - توقسانىنداعى رەسپۋبليكا اۆتووندىرۋشىلەرىنىڭ جۇمىس قورىتىندىسىن جاريالادى. باسقارما ءتوراعاسى جاريالاعان مالىمەتتەرگە سايكەس، 2017 -جىلدىڭ العاشقى ءۇش ايىندا رەسپۋبليكا اۋماعىندا 16,4 ميلليارد تەڭگەگە 3405 دانا اۆتوكولىك (جەڭىل كولىك، جۇك كولىگى، اۆتوبۋستار مەن ارنايى تەحنيكالار) شىعارىلعان. وسىلايشا، وتاندىق اۆتووندىرۋشىلەردىڭ شىعارىلىم كولەمى وتكەن جىلمەن سالىستىرعاندا 4 ەسەگە ارتقان. العاشقى توقساندا ەل اۋماعىندا 3095 دانا جەڭىل كولىك شىعارىلىپ، بۇل وتكەن جىلعى كورسەتكىشتەن 7 ەسە اسىپ ءتۇستى. ال جۇك كولىكتەرىن شىعارۋ، كەرىسىنشە، وتكەن جىلمەن سالىستىرعاندا 31,6 پايىز ازايعان. اۆتوبۋس تەحنيكاسىن شىعارۋ كولەمى (27 دانا) وزگەرىسسىز قالدى.
جەرگىلىكتى زاۋىتتاردا قۇراستىرىلعان جەڭىل كولىكتەردى ساتۋ بويىنشا Lada اۆتوكولىكتەرى العاشقى ۇشتىكتى قۇرادى.
اۆتور: ايجان سەرىكجان قىزى
