مۇحتار التىنبايەۆ ۇشۋ قاۋىپسىزدىگىن قاداعالايتىن ورگان قۇرۋدى ۇسىندى

بۇل جايىندا ق ر پرەمەر-ءمينيسترى باقىتجان ساعىنتايەۆتىڭ اتىنا جولدانعان سەناتور مۇحتار التىنبايەۆتىڭ دەپۋتاتتىق ساۋالىندا ايتىلعان، دەپ حابارلايدى قازاقپارات.

«مەنىڭ دەپۋتاتتىق ساۋال جولداۋىما سەبەپ بولىپ وتىرعان ازاماتتىق جانە مەملەكەتتىك اۆياتسيانىڭ وتاندىق سالاسىنداعى ۇشۋ قاۋىپسىزدىگىن قامتاماسىز ەتۋدىڭ ءتيىمسىز جۇيەسى بولىپ تابىلادى. ەگەر ستاتيستيكاعا ءمان بەرسەك، 2012-2016-جىلدار ارالىعىندا قازاقستاندا 30 دان استام اۋە اپاتتارى مەن وقىس وقيعالارى ورىن الىپ، 85 تەن اسا ادامنىڭ ءومىرى قيىلدى، بۇل سەرتيفيكاتتاۋ مەن قاداعالاۋ راسىمدەرى ساپاسىنىڭ تومەندىگىن كورسەتەدى»، - دەدى التىنبايەۆ.

سەناتوردىڭ ايتۋىنشا، وسىعان بايلانىستى بىرىنشىدەن، ازاماتتىق جانە مەملەكەتتىك اۆياتسياداعى سەرتيفيكاتتاۋ، قاداعالاۋ جانە باقىلاۋ جونىندەگى مەملەكەتتىك فۋنكتسيالاردى ءارتۇرلى مەملەكەتتىك ۆەدومستۆولارعا قايتا ءبولۋ قاجەت.

ەكىنشىدەن، قازاقستان رەسپۋبليكاسىنىڭ ۇكىمەتى جانىنان ۇشۋدىڭ قاۋىپسىزدىگىن قاداعالاۋدى جۇزەگە اسىراتىن جانە اۆياتسيالىق وقىس وقيعالارعا تەرگەپ-تەكسەرۋ جۇرگىزەتىن دەربەس مەملەكەتتىك ورگان قۇرۋ كەرەك. بۇل رەتتە بۇل ورگاننىڭ قىزمەتى ازاماتتىق اۆياتسيا سالاسىمەن عانا شەكتەلمەۋى ءتيىس.

ۇشىنشىدەن، ۇشۋ قاۋىپسىزدىگىن قامتاماسىز ەتۋ ماسەلەسىن بىرنەشە مەملەكەتتىك قۇرىلىمنىڭ جۇمىسىمەن بايلانىستى كەشەندى مىندەت رەتىندە قاراۋ كەرەك. ونى شەشۋدىڭ جولدارى وسى سالاداعى عىلىمي-زەرتتەۋ جۇمىستارىنىڭ ناتيجەلەرىنە، ولاردى قامتاماسىز ەتۋ پراكتيكاسىنا ەندىرۋگە دە بايلانىستى. «كورسەتىلگەن ماسەلەلەردى قاراۋىڭىزدى جانە قاراۋ ناتيجەسى بويىنشا زاڭدا بەلگىلەنگەن مەرزىمدە جازباشا جاۋاپ بەرۋىڭىزدى سۇرايمىن» - دەدى سەناتور.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى