شىمكەنت تۇرعىنى ارىزدانامىن دەپ سوتتالىپ كەتتى

وڭتۇستىك قازاقستان وبلىستىق سوتىنىڭ حابارلاۋىنشا، ەڭبەكشى اۋداندىق سوتىندا تونالعانى تۋرالى جالعان اقپارات بەرىپ، ارىز جازعان ازاماتتىڭ ءىسى قارالعان. اتالمىش قىلمىستىق ءىس ءۇشىن ازامات ق ر ق ك 3 -تارماعى 419 -بابى بويىنشا ايىپتى دەپ تانىلعان.

سوت ماتەريالدارى بويىنشا، ايىپتالۋشى ازامات جەڭىل اۆتوكولىگىنە وتىرعان جولاۋشىنى ءتورت مىڭ تەڭگەگە قالا سىرتىنداعى مەكەن-جايعا جەتكىزىپ تاستاۋعا كەلىسەدى. جولاۋشى قالتاسىندا اقشاسى جوعىن ايتىپ، جول اقىنى ۇيىنە جەتكەن سوڭ تولەيتىن بولىپ كەلىسەدى. الايدا ايتىلعان مەكەن-جايعا جەتىپ، ۇيگە كىرىپ كەتكەن سوڭ قايتىپ شىقپاي قويعان. ال ارتىنان بارعان كولىك جۇرگىزۋشىسىنە ەسىك اشقان ايەل ونداي ازاماتتى تانىمايتىندىعىن جەتكىزەدى. بۇعان اشۋلانعان كولىك جۇرگىزۋشىسى پوليتسياعا حابارلاسىپ، ءوزىن بەلگىسىز ازاماتتىڭ ۇرىپ-سوعىپ، 15 مىڭ تەڭگەسىن توناپ كەتكەنىن جەتكىزەدى. ارىز بويىنشا تەكسەرۋ باستاعان ءتارتىپ ساقشىلارى وقيعانىڭ باسقاشا وربىگەنىن بىلگەن سوڭ، شاعىمدانۋشىنىڭ ءوزىن جاۋاپقا تارتقان.

«سوت شاعىمدانۋشىنى ايىپتى دەپ تانىپ، ءۇش جىل التى اي مەرزىمگە باس بوستاندىعىنان ايىرۋ جازاسىنا كەسۋ تۋرالى ۇكىم شىعاردى. ۇكىم ءالى زاڭدى كۇشىنە ەنگەن جوق»، - دەلىنگەن حابارلامادا.

 Qasym.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى