تۇڭعىشباي جامانقۇلوۆتىڭ جۇبايى اكتەردىڭ دەنساۋلىعىنا قاتىستى مالىمدەمە جاسادى
«فەنيكس» فيلمىنىڭ تۇسىرىلىمىنە بولىنگەن قارجىنى قولدى قىلدى دەپ ايىپتالعان جامانقۇلوۆ كەشەگى سوتقا كەلە المادى دەپ حابارلايدى 31- ارنا.
الەۋمەتتىك جەلىلەر مەن اقپارات قۇرالدارىندا تارالعان «ول وزىنە تاعىلعان ايىپتاردى مويىندادى» دەگەن جالعان اقپارات ونىڭ دەنساۋلىعىن كۇرت ناشارلاتىپ جىبەرىپتى. بۇنى ءىس باستالعالى تۇڭعىش رەت ءبىزدىڭ ارناعا سۇقبات بەرگەن، جامانقۇلوۆتىڭ جارى داريا ءجۇسىپ ايتىپ وتىر.
«ءبىز ءبىر ايدىڭ ىشىندە 8 رەت جەدەل جاردەم شاقىرتتىق. وسىنىڭ بارىنە شىداپ كەلە جاتتى ول كىسى. تۇندە ساعات ۇشتە قاتتى قينالدى. جەدەل جاردەم شاقىرتقان جوق، «داريا، شاقىرماشى، بارعىم كەلمەيدى، ەرتەڭ سوت، سوتقا بارامىن» دەگەن اڭگىمە بولدى. ءبىراق تۇسكە قاراي شىداي المادى، شاقىردىق»، - دەيدى جامانقۇلوۆتىڭ جارى داريا ءجۇسىپ.
التى ايدان بەرى ازاپتى كۇندەر وتۋدە دەگەن اكتەردىڭ جارى داريا ءجۇسىپ تىلشىلەرمەن تۇڭعىش تىلدەستى. 17- ساۋىردەگى سوت وتىرىسىنان كەيىن ءوزىن جايسىز سەزىنگەن تۇڭعىشباي جامانقۇلوۆتىڭ جۇرەگى سىر بەرگەن. وعان جەلىلەردە جازىلعان جالعان اقپارات تا سەبەپ بولعان ەكەن. ال حالىق ءارتسىنىڭ تولىق اقتالىپ شىعۋىنا دالەل از دەيدى قورعاۋشىلار.
«قازىرگى تاڭدا سوت شەشىمى شىعادى، سوت شەشىمى ءبارىن انىقتايدى. ءبىراق ءدال قازىر جەتكىلىكتى دالەلدەمەلەر وتە از ءىس بويىنشا»، - دەيدى قورعاۋشى باقىتكۇل قادىربەكوۆا.
جامانقۇلوۆتىڭ قورعاۋشىلارى جالعان دەرەك تاراتقان اقپارات قۇرالدارىن زاڭ الدىندا جاۋاپقا تارتۋعا نيەتتى. ال ايىپتاۋ اكتىسى بويىنشا تۇڭعىشباي جامانقۇلوۆ قىلمىستىق ارەكەتتى بىرنەشە اداممەن بىرىگىپ جۇزەگە اسىردى دەلىنگەن.
فيلم تۇسىرىلىمىنە بولىنگەن 79 ميلليون تەڭگەنىڭ 69 ميلليونى قولدى بولىپتى. بۇل ءىس بويىنشا جالپى سانى 9 ادام جاۋاپقا تارتىلعان. ال ءتوزىمدى بولۋدى ۇيرەندىم دەگەن حالىق ءارتسىنىڭ جارى ونىڭ كىناسىزدىگىنە سەنىمدى.
«تازالىقپەن، شىندىقپەن قارايتىن بولسا، تۇڭعىشباي قادىروۆيچتىڭ ەش ايىبى جوق. ونى بۇكىل حالىق بىلەدى، قاسىنداعى ادامدار، جوعارىداعى ادامدار. ءبىراق نەگە ءمان بەرمەي وتىرعانى ماعان ۇلكەن قۇپيا»، - دەيدى داريا ءجۇسىپ.
ايىپتاۋ اكتىسىمەن تانىسقاننان كەيىن دەنساۋلىعى كۇرت ناشارلاعان حالىق ءارتسى تۇڭعىشباي جامانقۇلوۆ قالالىق كارديولوگيالىق ورتالىقتا جاتىر. ال كەشەگى سوت وتىرىسىنا نەگىزگى ايىپتالۋشىلاردىڭ ءبىرى سانالاتىن تۇڭعىشباي جامانقۇلوۆتىڭ دەنساۋلىعىنا بايلانىستى قاتىسا الماۋ سەبەبىنەن سۋديا سوت وتىرىسىن 27- ساۋىرگە بەلگىلەدى.
