مىرزان كەنجەباي: ولەڭشىلەر ولەرمەن كەلەدى

ول - وزىنە سىن ايتقان ادامدى جەردەن الىپ، جەرگە سالىپ، بار بالەنى ءۇيىپ-توگەتىن اۋىر سىرقات. سونداي ولەڭشىنىڭ ءبىرى سەرىك اقسۇڭقار ۇلى دەگەن. وتكەن جىلى جازۋشىلار وداعىنىڭ جىل قورتىندىسىندا امانحان ءالىم ونىڭ ولەڭ دەۋگە كەلمەيتىن ولەڭدەرىنەن سىپايىلاپ-اق مىسالدار كەلتىرىپ ەدى.

سەرىك ولەڭشى سونان بەرى امانحاننىڭ سوڭىنا ءتۇسىپ الدى. ادەتتە ەڭ دارىنسىز ادامدار پۋشكينشە ايتقاندا «پولۋ پولۋلار»، ياعني، جارتىكەش اقىندار كوزگە ءتۇسۋدىڭ، جۇرتقا تانىمال بولۋدىڭ الۋان-الۋان ايلا-شارعىسىن بىلەتىن ولەرمەن كەلەدى. ال ەندى مىناداي ولەڭ جازعان سەرىك اقسۇڭقار ۇلىنىڭ مەملەكەتتىك سىيلىققا ءوزىن-ءوزى ۇسىنۋى دا ۇيات ەمەس پە؟! قاراڭىزشى:

قازاقتىڭ جىرى ورىستىڭ جىرىنان تىم بولەك،

نۇر دا كوپ وندا، سامال جەل، جامال گۇل دە كوپ.

ەسىنەن تانىپ، تۇنەكتە جۇرگەن ەسەنين(؟)

ماعىمۇرلانعاندا ماعجان كوكەم - كۇنگە كەپ!(؟)

قازاقتىڭ جىرى قاراجورعامەن جەلەم دەۋ(؟)،

بلوكتان - سىرباي، تيحونوۆتان - تەمىرحان تەرەڭدەۋ.

كەڭشىلىك سىندى كەرەمەت اقىن جوق وندا،

ءو. نۇرعاليەۆ - ي. كۋزنەسوۆتان كەمەلدەۋ.

بۇل نە؟ پوەزيا ما، ادەبي سىن با، ورىس پوەزياسىنا باعا بەرۋ مە، الدە اۋزىنا كەلگەنىن ايتا سالۋ ما؟ الدە سەرىكتىڭ ماحاببات ليريكاسى ما؟ وسىلاردىڭ بىرەۋى عوي دەسەڭ، جۇرت ءوزىڭدى جىندىسىڭ با، الدە اۋرۋسىڭ با دەۋى مۇمكىن-اۋ. الدە ورىس- قازاق پوەزيالىق قاتىناستارى تۋرالى ۇلتارالىق ساياسي ليريكا دەپ اتالاتىن، سەرىك اقسۇڭقار ۇلى اشقان جاڭا جانر ما؟ ايتەۋىر، ساۋ ادامنىڭ ءسوزى دەۋ قيىن. ادەبيەت بولعاننان كەيىن، ادەبيەتتىڭ جاناشىرى بولعاننان كەيىن سىن، پىكىر ايتىلادى. امانحان ءالىم م. ماعاۋين، ولجاس، ت. ب. تۋرالى ءوز پىكىرىن ايتتى. ال م. ماقاتايەۆتىڭ پوەزياسى وزىنەن بۇرىن شىققان امانحان ايتقان مارقۇم اقىننىڭ (ءو. قوجامۇراتوۆ) ولەڭدەرىمەن ۇندەس ەكەنى راس. امانحان ولاردىڭ ەشقايسىسىن جامانداعان ەمەس. سەرىك امانحاننىڭ پىكىرلەرىن باسقاشا بۇرمالاپ، بەرىپ وتىر. س. اقسۇڭقار ۇلى جاي ولەڭشى ەمەس، شىن اقىن بولسا، ويتپەس ەدى...

 مىرزان كەنجەباي، اقىن، جۋرناليست

adebiportal.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى