الماتىنى قاپتاعان قايىر سۇراۋشى سىعانداردىڭ قۇپياسى ءمالىم بولدى
كوپشىلىك ولاردىڭ قايدان كەلگەنىن، قاي ۇلتتان ەكەنىن بىلمەيدى.
«بىزدە جۇرت جوق، ءار جەردە وسىلاي جۇرەمىز. سىعاندار ولار «رۋسسكيلەر»، ءبىز - مۇسىلمان، لولىلارمىز. ءبىزدىڭ ارعى اتالارىمىز لو دەگەن جىگىت پەن لى دەگەن قىز بولعان، ولار تۋىس بولا تۇرا، ۇيلەنىپ قويىپتى. سودان ءبىزدىڭ ۇلكەندەرىمىز ولاردى قارعاپ، «لولى» دەپ اتاپ كەتكەن. ەلدەن قۋىلعان سوڭ، ولار قول جايىپ، قايىر تىلەپ كۇن كورەدى»، - دەيدى كەلىنشەك.
مانۋ بىزبەن قازاق تىلىندە ەركىن سويلەستى. قولىندا التى ايلىق بالاسىن كوتەرىپ، الماتىدا جۇرگەنىنە ەكى جارىم جىلدان اسىپتى. بۇلار سىعانداردىڭ شىعىستاعى ءبىر تارماعى، وزدەرىن مۇسىلمان سانايدى. كەلىنشەكتىڭ ايتۋىنشا، ول كوزىن اشقالى قايىر تىلەۋمەن اينالىسادى ەكەن. «ءبىز وقىمايمىز، كيىنبەيمىز، قىدىرمايمىز. قايىر سۇراماساق بولمايدى، اۋىرامىز. كۇيەۋىم قۇرىلىستا ىستەيدى، قىزىم مەن ۇلىم «سالامات» بازارى جاقتا ءجۇر.
ءوزىم ارباتتا قايىر تىلەيمىن. الماتىدا اقشا كوپ، ادامدارى «دوبرىي». وتكەن جىلى استانادا بولعانبىز، ول جاقتا اقشا از، ادامدارى دا جامان»، - دەيدى قايىر تىلەيتىن كەلىنشەك. مانۋدىڭ ايتۋىنشا، الماتىدا كۇن سايىنعى تابىسى كەمىندە 1500-2000 تەڭگەنى قۇرايدى. ال جۇما كۇندەرى ون مىڭعا دەيىن تابىس تاباتىن كەزدەرى بولادى ەكەن. كۇن سايىن تاڭعى ساعات جەتىدە جول توساتىن كەلىنشەك بالاسىن ارقالاپ، ۇيىنە ءتۇن باتا بارادى.
«تاڭعى بەستە تۇرامىز، نامازدان كەيىن كوشەگە كەتەمىز. كەشكە ۇيدە جينالامىز. قىستا ءۇي جالدايمىز، جازدا پالاتكادا جاتامىز. ءۇيىمىز دارحان اۋىلىندا. اقشا جەتپەيدى، بالامنىڭ پامپەرسى بار، تاماعىمىز بار. ونىڭ ۇستىندە كوشەدە قايىر تىلەگەنىمىز ءۇشىن «اقى» تولەيمىز»، - دەيدى مانۋ.
ءيا، الماتى كوشەلەرىندە تىنىش قانا قايىر سۇراۋ ءۇشىن ولار وزدەرىنە باس-كوز بولىپ وتىرعان ادامدارعا كۇندىك تابىسىنىڭ ءبىر مولشەرىن بەرىپ وتىرادى. باستىقتارىن وزدەرى دە كورمەگەن، تەك كەشكە ءبىر جىگىت كەلىپ، اقشا جيناپ كەتەدى ەكەن.
ايتا كەتەرلىگى، مانۋدى اڭگىمەگە تارتقانىمىز ءۇشىن اقشا تولەۋگە تۋرا كەلدى. مانۋدىڭ تاجىكستاندا ءوز ءۇيى بار. ول الماتىدا اقشا ءۇشىن جۇرگەنىن، ءبىراز جىلدان سوڭ ەلىنە قايتاتىنىن ايتتى.
Nur.kz
