رونالدۋدىڭ حەت-تريگى «رەالدى» چەمپيوندار ليگاسىنىڭ جارتىلاي فينالىنا شىعاردى
يسپانيا استاناسىنداعى «سانتياگو بەرنابەۋ» ستاديونىندا وتكەن كەزدەسۋ ساناۋلى ساتتەر بۇرىن 4:2 ەسەبىمەن اياقتالدى.
ەسەپ ويىننىڭ 56-مينۋتىندا اشىلدى. پەنالتيدى ءساتتى ورىنداعان روبەرت ليەۆاندوۆسكي بولعان. الايدا 76 مينۋتتا كريشتيانۋ رونالدۋ ەسەپتى تەڭەستىردى. اراعا ەكى مينۋت سالىپ سەرحيو راموس ءوز قاقپاسىنا گول سالىپ الدى - 1:2.
ويىننىڭ نەگىزگى ۋاقىتى وسى ەسەپپەن اياقتالعان. اتاپ ءوتۋ كەرەك، 84 مينۋتتا ارتۋرو ۆيدال ەكىنشى سارى قاعاز العان سوڭ الاڭنان قۋىلعان. وۆەرتايمدا وسى ويىنشىنىڭ جوقتىعى نەمىس ماشيناسىن العا جۇرگىزبەي قويعانداي بولدى.
105- جانە 110-مينۋتتا رونالدۋ ەكى دوپ سالىپ، حەت-تريك ورىندادى. 112 مينۋتتا ماركو اسەنسيو ءتورتىنشى گولدى «باۆاريا» قاقپاسىندا تۋلاتتى. وسىلايشا «رەال» جالپى 6:3 ەسەبىمەن شيرەك فينالدان ءساتتى ءوتتى.
ايتا كەتەيىك، كورولدىك كلۋب ويىنشىلارى وسىمەن 7-مارتە قاتارىنان چ ل- دىڭ جارتىلاي فينالىندا ويناعالى وتىر جانە ولار ءتۋرنيردىڭ قازىرگى چەمپيونى. ودان بولەك، ءمادريدتىڭ «اتلەتيكو» فۋتبول كلۋبى چەمپيوندار ليگاسىنىڭ جارتىلاي فينالىنا شىقتى.
لەستەرمەن وتكەن قارىمتا ويىندا قوس كوماندا 1:1 ەسەبىمەن تەڭ تارقاستى. يسپاندىقتار شيرەك فينالدىڭ ءبىرىنشى ويىنىندا ءوز الاڭىندا 1:0 ەسەبىمەن جەڭىسكە جەتكەن بولاتىن. ال انگليادا جارتىلاي فينالعا شىعۋ ءۇشىن تەڭ ناتيجە دە جەتكىلىكتى بولدى.
ويىنداعى ءبىرىنشى گولدى «اتلەتيكو» كومانداسى سوقتى. 26 مينۋتتا ساۋل نيگەستىڭ باسپەن باعىتتاعان دوبىن كاسپەر شمەيحەل قايتارا المادى. 61 مينۋتتا دجەيمي ۆاردي تارازى باسىن تەڭەستىردى. ودان كەيىنگى ۋاقىتتا كوماندالار اراسىنداعى ەسەپكە وزگەرىس ەنبەدى.
ايتا كەتەيىك، وتكەن ماۋسىمدا انگليا پرەمەر- ليگاسىنىڭ چەمپيونى اتانعان «لەستەر» چەمپيوندار ليگاسىنا ءوز تاريحىندا العاش رەت قاتىستى. ال «اتلەتيكو» ەۋروپانىڭ باستى دوداسىندا 12-رەت باق سىناپ وتىر. ونىڭ 4-ەۋىندە جارتىلاي فينالعا شىققان. ەرتەڭ شيرەك فينالدىق سىننىڭ سوڭعى ەكى ويىنى وتەدى. فرانسيالىق «موناكو» نەمىستىڭ دورتمۋندتىق «بورۋسسياسىن» قابىلدايدى ء(بىرىنشى ويىنداعى ەسەپ - 3:2). ال يسپاندىق «بارسەلونا» يتاليالىق «يۋۆەنتۋسپەن» (0:3) كەزدەسەدى. قوس ويىن دا استانا ۋاقىتىمەن 00:45 تە باستالادى.
