نۇرسۇلتان نازاربايەۆ تۇرىكمەنستان پرەزيدەنتىن ءبىرىنشى دارەجەلى «دوستىق» وردەنىمەن ماراپاتتادى
ەكى ەلدىڭ كوشباسشىلارى كۇن تارتىبىندەگى حالىقارالىق جانە وڭىرلىك وزەكتى تاقىرىپتاردى تالقىلادى، دەپ حابارلادى اقوردانىڭ باسپا ءسوز قىزمەتى.
كەلىسسوز بارىسىندا مەملەكەت باسشىسى تۇرىكمەنستان پرەزيدەنتىنىڭ ساپارى ەلدەرىمىز اراسىنداعى ديپلوماتيالىق قاتىناستىڭ 25 جىلدىعىمەن تۇسپا- تۇس كەلگەنىن اتاپ ءوتتى.
- ءبىزدىڭ قاتىناسىمىز شيرەك عاسىردا ءوزارا سەنىم جانە قولداۋدىڭ نەگىزىندە قالىپتاستى. تۇرىكمەنستان - قازاقستاننىڭ وڭىردەگى ماڭىزدى سەرىكتەسى ءارى وداقتاسى. ەكى ەلدىڭ حالقى ءبىر- بىرىمەن باۋىرلاس ءارى تاتۋ كورشى. ءبىزدى عاسىرلار قويناۋىنان جالعاسىپ كەلە جاتقان ورتاق تاريحي تامىر، ءتىل مەن ءدىن بايلانىستىرادى، - دەدى قازاقستان پرەزيدەنتى.
نۇرسۇلتان نازاربايەۆ جەكەلەگەن باعىتتار، سونىڭ ىشىندە كولىك- ترانزيت جانە ەنەرگەتيكا سالالارى بويىنشا ەكىجاقتى ىنتىماقتاستىقتىڭ دامىپ كەلە جاتقانىن اتاپ ءوتىپ، بۇل رەتتە باسقا دا سالالاردىڭ زور پەرسپەكتيۆاسى بار ەكەنىنە نازار اۋداردى.
- بۇگىن ءبىز قازاقستان مەن تۇرىكمەنستان اراسىنداعى ستراتەگيالىق سەرىكتەستىك تۋرالى اسا ماڭىزدى شارتقا قول قويامىز. وسى كەلىسىمنىڭ ارقاسىندا قاتىناستارىمىز دامۋدىڭ جاڭا كەزەڭىنە وتكەلى تۇر. ءبىز ەلدەرىمىز اراسىنداعى شەكاراعا قاتىستى بارلىق ماسەلەنى شەشەمىز. شەكاراعا قاتىستى تۇيتكىلدى ماسەلەلەرى مۇلدەم جوق ەلدەر ءبىزدىڭ ەكى مەملەكەتتەرىمىز عانا بولماق، - دەدى مەملەكەت باسشىسى.
گ. بەردىمۇحامەدوۆ ءوزىنىڭ قازاقستانعا مەملەكەتتىك ساپارى ەكى ەل اراسىنداعى ىنتىماقتاستىقتى نىعايتا تۇسەتىنىنە سەنىم ءبىلدىردى. ەكى ەل پرەزيدەنتتەرى حالىقارالىق ساياسات، ەكىجاقتى ىنتىماقتاستىق، وڭىرلىك ءوزارا ءىس- قيمىل، مادەني- گۋمانيتارلىق جانە الەۋمەتتىك سالالارداعى ىنتىماقتاستىق ماسەلەلەرىن تالقىلادى.
- قازاقستان مەن تۇرىكمەنستاننىڭ حالىقارالىق ارەنادا وڭ بەدەل مەن رەيتينگكە يە بولىپ كەلە جاتقانىن ەرەكشە اتاپ وتكەن ءجون. ءبىز بەيبىتشىلىك، تۇراقتىلىق جانە قاۋىپسىزدىك ماسەلەلەرى بويىنشا ءوز ۇستانىمىمىزدى تەك وڭىردە عانا ەمەس، بۇكىل دۇنيە جۇزىندە ب ۇ ۇ مەن ە ى ق ۇ سياقتى حالىقارالىق قۇرىلىمدارمەن بىرگە ايقىنداپ كەلەمىز، - دەدى گ. بەردىمۇحامەدوۆ.
سونداي- اق، كەڭەيتىلگەن قۇرامداعى كەلىسسوزدەر اياقتالعان سوڭ قازاقستان مەن تۇرىكمەنستان ەلدەرىنىڭ باسشىلارى بۇقارالىق اقپارات قۇرالدارى الدىندا مالىمدەمە جاسادى.
نۇرسۇلتان نازاربايەۆ ەكى ەلدىڭ پرەمەر- مينيسترلەرىنىڭ ورىنباسارلارى ءتوراعالىق ەتەتىن ەكونوميكالىق ىنتىماقتاستىق جونىندەگى ۇكىمەتارالىق كوميسسيا ەكىجاقتى ىنتىماقتاستىقتىڭ نەگىزگى مىندەتتەرىنە قول جەتكىزۋ بارىسىندا ەرەكشە ءرول اتقاراتىنىن اتاپ ءوتتى. قازاقستان پرەزيدەنتى كەلىسسىوزدەر بارىسىندا تاراپتار شارتتىق- قۇقىقتىق بازانى جەتىلدىرۋگە، كاسىپورىنداردىڭ ەكى ەلدەگى ءىرى ينفراقۇرىلىمدىق جوبالارعا قاتىسۋىنا، سونداي- اق ترانزيت- كولىك سالاسىنداعى ءوزارا ءىس- قيمىلعا نازار اۋدارعانىن اتاپ ءوتتى.
- «قازاقستان - تۇرىكمەنستان - يران» تەمىرجولىنىڭ ىسكە قوسىلۋىن ترانزيتتىك- كولىكتىك ءوزارا ءىس- قيمىل سالاسىنداعى تاريحي وقيعا دەۋگە بولادى. ءوزارا تاۋار اينالىمىن ۇلعايتۋ ىسىندە ەكى ەلدىڭ كاسىپكەرلەرى وسى ارتىقشىلىقتى پايدالانا بىلگەنى ءجون، - دەدى مەملەكەت باسشىسى.
نۇرسۇلتان نازاربايەۆ كەلىسسوزدەر بارىسىندا سۋ- ەنەرگەتيكا سالاسى جانە ارالدى قۇتقارۋعا ارنالعان حالىقارالىق قور قىزمەتىن جانداندىرۋ ماسەلەسى ارنايى قوزعالعانىنا نازار اۋداردى.
- ورتالىق ازياداعى شەكارالاس وزەندەردىڭ سۋ رەسۋرستارى ورتاق يگىلىك بولىپ سانالاتىنىن تاعى دا ماقۇلدادىق. ولاردى ورنىمەن پايدالانۋ ونداعان ميلليون ادامنىڭ تاعدىرىنا اسەر ەتەدى. بيىل ارالدى قۇتقارۋعا ارنالعان حالىقارالىق قورعا ءتوراعالىق ەتۋ مىندەتى تۇرىكمەنستانعا كوشتى، - دەدى قازاقستان پرەزيدەنتى. تۇرىكمەنستان پرەزيدەنتىنىڭ قازاقستان رەسپۋبليكاسىنا مەملەكەتتىك ساپارىنىڭ قورىتىندىسى بويىنشا مىناداي قۇجاتتار قابىلداندى:
- قازاقستان رەسپۋبليكاسى پرەزيدەنتى مەن تۇرىكمەنستان پرەزيدەنتىنىڭ بىرلەسكەن مالىمدەمەسى؛
- قازاقستان رەسپۋبليكاسى مەن تۇرىكمەنستان اراسىنداعى ستراتەگيالىق سەرىكتەستىك تۋرالى شارت؛ - قازاقستان رەسپۋبليكاسى مەن تۇرىكمەنستان اراسىنداعى قازاقستان- تۇرىكمەنستان مەملەكەتتىك شەكاراسىن بەلگىلەۋ تۋرالى كەلىسىم؛ - قازاقستان رەسپۋبليكاسىنىڭ ۇكىمەتى مەن تۇرىكمەنستاننىڭ ۇكىمەتى اراسىنداعى قازاقستان- تۇرىكمەنستان ۇكىمەتارالىق كوميسسياسى تۋرالى كەلىسىم؛ - قازاقستان رەسپۋبليكاسىنىڭ ۇكىمەتى مەن تۇرىكمەنستاننىڭ ۇكىمەتى اراسىنداعى قۇپيا اقپاراتتاردى ءوزارا ساقتاۋ تۋرالى كەلىسىم؛ - قازاقستان رەسپۋبليكاسى سىرتقى ىستەر مينيسترلىگى مەن تۇرىكمەنستان سىرتقى ىستەر مينيسترلىگى اراسىنداعى 2017-2018 -جىلدارعا ارنالعان ىنتىماقتاستىق جونىندەگى باعدارلاما؛ - قازاقستان رەسپۋبليكاسى قارجى مينيسترلىگى مەن تۇرىكمەنستان قارجى مينيسترلىگى اراسىنداعى قىلمىستىق جولمەن تۇسكەن كىرىستەردى زاڭداستىرۋعا (جىلىستاتۋعا) ، تەرروريزمدى قارجىلاندىرۋعا قارسى كۇرەس سالاسىنداعى ءوزارا ءىس- قيمىل تۋرالى كەلىسىم؛ - استانا مەن اشحاباد اراسىندا باۋىرلاستىق بايلانىس ورناتۋ تۋرالى كەلىسىم؛ - قازاقستان رەسپۋبليكاسىنىڭ «اتامەكەن» ۇلتتىق كاسىپكەرلەر پالاتاسى مەن تۇرىكمەنستاننىڭ ساۋدا- ونەركاسىپ پالاتاسى اراسىنداعى ىنتىماقتاستىق تۋرالى كەلىسىم.
