تۇركىمەنستان «دوۆلەت حابارلارى» جانە «قازاقپارات» اقپارات الماسۋعا ۋاعدالاستى

قۇجاتتى «قازاقپارات» اگەنتتىگىنىڭ باس ديرەكتورى اسقار وماروۆ پەن «تۇركىمەنستان دوۆلەت حابارلارى» اگەنتتىگىنىڭ ءتوراعاسى بەكدۋردى امانسارىيەۆ راسىمدەدى.

 اسقار وماروۆ ءوز سوزىندە كەلىسىمشارتقا تۇركىمەنستان پرەزيدەنتى گۋربانگۋلى بەردىمۇحامەدوۆتىڭ قازاقستانعا مەملەكەتتىك ساپارى اياسىندا قول قويىلىپ وتىرعاندىعىن اتاپ ءوتتى.

«كەلىسىمشارتتىڭ نەگىزگى باعىتى باۋىرلاس ەكى ەلدىڭ اراسىنداعى بايلانىستاردى نىعايتىپ، جاڭالىقتارمەن، سۋرەتتەرمەن ءبولىسۋ بولماق. وزدەرىڭىز دە بىلەسىزدەر، قازىرگى كەزدە ورتالىق ازيا ەلدەرىنىڭ اراسىندا ينتەگراتسيالىق پروتسەستەر وتە قارقىندى جۇرگىزىلۋدە. تۇركىمەنستان مەن قازاقستان اراسىندا دا ءبىرقاتار جوبا بار. ماسەلەن، «قازاقستان- تۇركىمەنستان- يران» تەمىر جولى سالىنعان. مۇنان وزگە دە جوبالار ىسكە اسىرىلۋدا. سولاردىڭ بارلىعىن تۇركىمەن اقپارات اگەنتتىگىندە، قازاقپاراتتا جاريالاپ وتىراتىن بولامىز. ياعني، ءوزارا اقپارات الماسۋ تۋرالى بۇل مەموراندۋم ەكى ەلدى ءبىر- بىرىنە جاقىنداتا ءتۇسۋ ءۇشىن جاسالدى»، - دەدى «قازاقپاراتتىڭ» باس ديرەكتورى.

ءوز كەزەگىندە بەكدۋردى امانسارىيەۆ اگەنتتىكتەر اراسىنداعى كەلىسىمشارتقا قول قويۋ ءراسىمىن ەكى ەل پرەزيدەنتتەرىنىڭ ماڭىزدى كەلىسسوزدەرى اياسىنداعى تاريحي ءسات دەپ باعالايتىندىعىن اتاپ ءوتتى.

 «ءبىزدىڭ حالىقتارىمىز تاريحى مەن مادەنيەتى ورتاق باۋىرلاس حالىق سانالادى. العا قويعان ماقساتىمىز ءبىر، ەكونوميكالىق بايلانىستارىمىز جوعارى»، - دەپ اتاپ ءوتتى ول.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى