اۋە كومپانياسى «ەير استانا» جولاۋشىلارىنا ەت اسىپ، قۇرت تاراتا ما
«ەير استانا» اۋە كومپانياسى باسپا ءسوز قىزمەتىنىڭ مالىمەتىنە سۇيەنسەك، قازىرگى ۋاقىتتا كومپانيا حالىقارالىق رەيستەردى ورىنداعاندا ۇشىپ شىققان ەلدىڭ تاماعىن جولاۋشىلارعا ۇسىنىپ وتىر.
«مىسالى، دەليدەن ۇشىپ شىققان جولاۋشىلارعا ءۇندىستاندىق ماتار پانير تاعامى ۇسىنىلسا، بەيجىڭنەن مىنگەن جولاۋشىلارعا قىتاي شاياندارى قۋىرىلعان كەسپەسىمەن بەرىلەدى. ال، 1- ساۋىردەن باستاپ، استانادان ۇشىپ شىققان بارلىق رەيستەردىڭ ەكونوم- كلاستاعى جولاۋشىلارىنا پالاۋ بەرىلە باستادى»، - دەدى اك ماماندارى.
كومپانيا وكىلدەرىنىڭ ايتۋىنشا، بيزنەسس- كلاستاعى جولاۋشىلارعا پالاۋ مامىر ايىنان باستاپ بەرىلمەك ەكەن.
«ۇلتىمىزدىڭ ءتۇرلى تاعامدارىن اس مازىرىنە ەندىرۋگە بولادى. الايدا، استى بابىمەن ازىرلەپ، ونىڭ ءدامىن كەلتىرۋ جاعى قيىندىق تۋعىزىپ وتىر. ماسەلەن، ەت اساتىن بولساق، ونىڭ كەسپەسى، ءيا جايماسى سۋىپ قالادى، ونى سول كۇيىندە قازاننان ءتۇسىرىپ بەرە المايسىڭ. ونىڭ ۇستىنە، ونى دايىندايتىن قۇرالدار دا قاجەت. قازىرگى ۋاقىتتا كومپانيا تەحنيكا ساتىپ الۋ جاعىن قاراستىرىپ وتىر. مانتى تەك بيزنەس- كلاستاعى جولاۋشىلارعا عانا بەرىلەدى. سەبەبى، ونى دا قولمەن ءتۇيىپ، سۋىتپاي ۇسىنۋ كەرەك. دەگەنمەن، ايتا كەتەيىك، اۋە كومپانيامىز اس مازىرىندەگى تاعامدار ءتۇرىن كوبەيتۋ بويىنشا ىزدەنىسىن توقتاتقان ەمەس»، - دەدى اتالعان اۋە كومپانياسىنىڭ ماماندارى.
سونىمەن قاتار، ءبىز اۋە كومپانياسى نە سەبەپتەن ۇشاق اۋەگە كوتەرىلگەندە جانە قونۋعا باعىت العاندا ۇلەستىرىلەتىن كونفەت ورنىنا قۇرت تاراتىلمايتىنىن سۇرادىق.
«ەير استانا» اۋە كومپانياسىنىڭ ماماندارى كونفەتتىڭ قۇلاق بىتەلگەندە جاقسى كومەكتەسەتىن قاسيەتى بار ەكەنىن، ال قۇرتتىڭ قۇرامىندا ونداي قاجەتتى زاتتىڭ جوق ەكەنىن ايتتى.
اۆتور: الماس مۇقاش ۇلى
