قازاقستان كاسپي تەڭىزىندە مۇناي تانكەرلەرىنە تالاپتى كۇشەيتتى
بۇل تۋرالى بۇگىن ق ر پارلامەنتى سەناتىندا ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ كەڭەيتىلگەن وتىرىسىنان كەيىن ق ر ينۆەستيتسيالار جانە دامۋ مينيسترلىگى كولىك كوميتەتىنىڭ ءتوراعاسى اسەت اساۋبايەۆ ءمالىم ەتتى، دەپ حابارلايدى قازاقپارات.
«دەپۋتاتتار تاراپىنان ازىرلەنگەن زاڭ جوباسىن تالقىلادىق، ياعني كولىك ماسەلەلەرى بويىنشا تۇزەتۋلەر ەنگىزىلىپ جاتىر. اتاپ ايتقاندا، سۋ كولىگى بويىنشا ەكولوگيالىق كودەكسكە ءتيىستى نورمالار ەنگىزىلۋدە. مىسالى، كاسپيدە كەمەلەر مۇناي ارالاسقان سۋدى توكپەۋىن، قوقىستاردى شاشپاۋىن، پلاستيكالىق زاتتاردى تەڭىزگە تاستاماۋىن قاتاڭ قاداعالايتىن نورمالار ەسكەرىلدى. سونىمەن قاتار، تەڭىز ارقىلى مۇناي تاسىمالدايتىن تانكەرلەردىڭ تۇبىندە قوس قاباتتى قالىڭداتىلعان بولىكتەرىنىڭ بولۋى سەكىلدى قوسىمشا تالاپتار قويىلىپ وتىر»، - دەدى كوميتەت ءتوراعاسى.
ونىڭ سوزىنە قاراعاندا، زاڭ جوباسىندا سارالانعان تاريفتەر بويىنشا ءىس- قيمىلدار قاراستىرىلعان.
«بۇگىندە الماتى مەن استانادا اۆتوبۋستاردا ەلەكتروندى كولىك جۇيەلەرى قۇرىلعانى بەلگىلى. وسى ورايدا جۇيەدە سارالانعان تاريفتەردى پايدالانۋ باعىتىندا ءتيىستى زاڭنامالىق نورمالار ەنگىزىلدى»، - دەدى ول.
بۇدان بولەك، كولىكتەگى قاۋىپسىزدىكتى قامتاماسىز ەتۋ ءۇشىن قاداعالاۋ شارالارى قۇزىرلى ورگاندارعا بەرىلىپ جاتىر.
«ترامۆايلاردىڭ جۇمىسىن ۇيىمداستىرۋ جەرگىلىكتى اكىمدىكتەرگە تيەسىلى. ءبىراق كولىكتى پايدالانعان كەزدە قاۋىپسىزدىك تالاپتارىنىڭ ساقتالۋىن تەكسەرۋ كولىكتىك باقىلاۋ ينسپەكتسيالارىنىڭ قۇزىرەتىنە بەرىلەتىن بولادى. بۇگىندە تەمىر جولدا وسىنداي باقىلاۋ جۇرگىزىلەدى جانە مۇنداي شارالاردى اتقارۋعا قاجەتتى قۇرال- جابدىقتار بار. وسىنداي قۇزىرەتپەن قوسىمشا ءتورت قالاداعى ترامۆايلاردىڭ قاۋىپسىزدىگىن قامتاماسىز ەتۋ ءۇشىن باقىلاۋ كولىكتىك ينسپەكسياعا بەرىلەدى»، - دەدى ءا. اساۋبايەۆ.
اۆتور: رۋسلان عابباسوۆ
