ديماش فرانسيا مەن امەريكاعا باراتىن بولدى
ءانشىنىڭ ەندىگى جوسپارلارى قانداي؟ ول حالىقارالىق «ەۆروۆيدەنيە» بايقاۋىنا قاتىسا ما؟
بۇل تۋرالى مادەنيەت جانە سپورت ۆيتسە- ءمينيسترى اقتوتى رايىمقۇلوۆا Sputnik-كە بەرگەن سۇحباتىندا ايتىپ بەردى.
ايتا كەتەيىك، رايىمقۇلوۆا I am a singer بايقاۋىنىڭ اقتىق كەزەڭىندە ديماشتى قولداۋعا اتتانعان دەلەگاتسيا قۇرامىندا بولدى.
- ديماش قۇدايبەرگەن قازاقستان مەن قىتاي اراسىنداعى مادەني ىنتىماقتاستىققا جاڭا لەپ اكەلدى...
- قىتايلار ديماشتى ەكى ەل اراسىنداعى «التىن كوپىرگە» تەڭەيدى. ولاردىڭ ديماشقا دەگەن قارىم- قاتىناستارى، كوزقاراستارى وتە جاقسى. قايدا بارساڭ «ديماشي» دەگەندى ەستيسىڭ. I am a singer بايقاۋى پەكيندە ەمەس، چانشا قالاسىندا وتسە دە، قىتايداعى ەڭ بەدەلدى جوبا سانالادى. ەگەر اتالعان بايقاۋعا قاتىسىپ، كەزەڭنەن كەزەڭگە وتەتىن بولساڭ، سەنى بۇكىل ازيا تانيدى دەپ ەسەپتەۋگە بولادى. ديماش: «جوبانىڭ بەل ورتاسىنا دەيىن جەتسەم دە جاقسى» ، - دەگەن بولاتىن. جەلىدە كەيبىر قازاقستاندىقتار «ديماش قىتايداعى بايقاۋعا دەيىن ءوز وتانىندا باعالانباپ ەدى» ، - دەپ جازۋدا. الەۋمەتتىك جەلىدەگى پىكىرلەر كوڭىلگە تيەدى. ءبىراق بۇل جەردە ەشكىم «قىستىرىلۋدى» قالامايدى. مەملەكەت بۇعان دەيىن دە وعان قارجىلاي قولداۋ كورسەتتى، ونى «سلاۆيانسكيي بازار» بايقاۋىنا (وندا ديماش گران- پري جۇلدەسىن يەلەنگەن بولاتىن) جىبەردى. I am a singer- گە اتتاندىردى، ول «جاس قانات» بايقاۋىنا قاتىسىپ، گران- پري جەڭىپ الدى، ال ءبىرىنشى كۋرستا وقىپ جۇرگەن كەزىندە «دارىن» مەملەكەتتىك جاستار سىيلىعىنىڭ لاۋرەاتى اتاندى. ۇكىمەتتىڭ كونسەرتتەرىندە دە ءجيى بوي كورسەتتى.
مۇنى ايتۋلى جەتىستىك دەپ كەۋدەمىزدى سوقپايمىز. تالانتتى جاستاردى قولداۋ - ءبىزدىڭ مىندەتىمىز. ءبىز ءۇشىن ءاربىر تالانتتى مۋزىكانتتىڭ، سپورتشىنىڭ ونەر كورسەتۋى - قۋانىشپەن پارا- پار. وسىلاي قۋانىپ جاتساق، الەۋمەتتىك جەلىدە «مينيسترلىك ەندى ويانىپ جاتىر، ولاردىڭ قاتىسى قانشا» دەگەن سياقتى سوزدەر ايتىلىپ قالادى. سوندا ءبىز نەگە قۋانا المايدى ەكەنبىز؟ ! ياعني، ايتايىن دەگەنىم، ديماش ءبىر كۇندە جارق ەتكەن، وزىمىزدە مويىندالماعان ءانشى ەمەس. مەملەكەت جاس تالانتتارعا قولداۋىن اياپ جاتقان جوق.
- ايتقانداي، «Singer-2017» ءان بايقاۋى اياقتالدى، ديماش ەلگە قاشان ورالادى؟
- جوبا اياسىندا ونىڭ بەلگىلى ءبىر مىندەتتەمەلەرى بار. بايقاۋدىڭ ءاربىر قاتىسۋشىسى كەلىسىمگە قول قويعان بولاتىن. ءالى دە ونىڭ مەرزىمى اياقتالعان جوق. ءتۇرلى شارالارعا قاتىسىپ جۇرگەنىن كورىپ جۇرسىزدەر. مۇنىڭ بارلىعى بايقاۋدىڭ ەرەجەسى اياسىنداعى جۇمىس. كەشە پەكيندە ورتالىق كونسەرت زالدارىنىڭ بىرىندە وتكەن كونسەرتكە ايمان مۇساحودجايەۆا، ونەر ۋنيۆەرسيتەتىنىڭ ۇلتتىق فولكلور ءانسامبلى، كامەرالىق وركەستر قاتىستى. وسى كونتسەرتتە ديماش تا ونەر كورسەتتى. 22 - ساۋىردە تاعى ءبىر ماڭىزدى شاراعا قاتىسادى، سوسىن ءبىر ۇزىلىستە ەلگە ورالادى. ونىڭ جەڭىسىنە ارنالعان ۇلكەن شارا وتكىزەمىز.
- اقتوتى راحمەتوللا قىزى، ءسوز سوڭىندا ديماشتىڭ الداعى جوسپارى تۋرالى ايتا كەتسەڭىز.
- ديماش قۇدايبەرگەن كانن فەستيۆالى اياسىندا قازاقستاننىڭ پاۆيلونىن تانىستىرۋ راسىمىنە قاتىسادى. ونى فرانسياعا شاقىردى. سونىمەن بىرگە، ديماشتى امەريكاعا وقۋعا جىبەرمەكپىز. بايقاۋ كەزىندە ول فرانسياعا بارىپ قايتتى. وندا بەلگىلى ءبىر تۇسىرىلمدەر ءوتىپ، كەلىسسوزدەر جۇرگىزىلدى. جالپى، بۇگىندە كوپ جەردەن ۇسىنىس كەلىپ ءتۇسىپ جاتىر ەكەن. ىنتىماقتاستىق تۋرالى، وقۋ، تاعىلىمدامادان ءوتۋ، كونكۋرستارعا، شارالارعا قاتىسۋ بويىنشا ۇسىنىستار بار. 27 - ماۋسىمدا استانادا ديماشتىڭ ۇلكەن كونسەرتى وتەدى. بۇگىندە بىرنەشە بەلگىلى شەتەلدىك ءانشى كونسەرتتە ونەر كورسەتەتىنىن راستادى. قازىر قىزۋ دايىندىق ءجۇرىپ جاتىر. قىتايدان انشىلەر قاتىسادى دەپ كۇتىپ وتىرمىز. ازىرگە، جۋىق اراداعى جوسپار وسىنداي. بۇدان بولەك، «ەۆروۆيدەنيەگە» قاتىستى كوپ اڭگىمە ايتىلىپ ءجۇر. جالپى، ءبىز ءۇش جىلدان بەرى ءوتىنىش بەرىپ كەلەمىز. وكىنىشكە قاراي، بۇل بايقاۋعا ەۋروپا ەلى رەتىندە قاتىسا المايمىز. ولار ءبىزدىڭ ءوتىنىشتى بەلگىلى ءبىر قۇقىقتىق شەكتەۋى بار قاتىسۋشى رەتىندە قاراستىرا الادى. ءبىز ديماشتىڭ قوناق رەتىندە قاتىسۋىن ۇسىندىق. ءبىراق ۋاقىت تىعىز بولىپ قالدى، ويتكەنى «ەۆروۆيدەنيە» مامىر ايىندا وتەدى. ال ديماشتىڭ ازىرگە قىتايلىق ارنانىڭ الدىنداعى مىندەتتەمەلەرى بار. بيىل بولماسا، كەلەسى جىلى ءبىزدىڭ ءوتىنىشىمىزدى قاراستىرادى دەگەن ويدامىز. ولاردىڭ قوناق رەتىندە بولسا دا ديماشتىڭ قاتىسۋىنا قىزىعۋشىلىعى بار. وزدەرىڭىز بىلەسىزدەر، الەۋمەتتىك جەلىدە كوپ جازىلىپ جاتىر. ەگەر لارا فابيان سەكىلدى ايگىلى ءانشى ءوزى قۇتتىقتاپ جاتسا، باسقا دا ادامدار ەستىدى دەپ ويلايمىز.
