قازاقستاندا «سيفرلى اسكەر» باعدارلاماسى جۇزەگە اسىرىلماق

بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە باس شتاب باسشىسىنىڭ ورىنباسارى، گەنەرال-مايور مۇحامەدجان تالاسوۆ ءمالىم ەتتى، دەپ حابارلايدى قازاقپارات.

«قازاقستان پرەزيدەنتىنىڭ «سيفرلى قازاقستان» باعدارلاماسىن جۇزەگە اسىرۋ ماقساتىندا اسكەردىڭ كۇندەلىكتى قىزمەتىن ءتيىمدى باسقارۋ ءۇشىن جاڭا اقپاراتتىق تەحنولوگيالاردى قولدانۋ ارقىلى «سيفرلى اسكەر» باعدارلاماسى جاساقتالا باستادى. ول «سيفرلى قازاقستان» باعدارلاماسىمەن ىقپالداستىرىلادى. اتاپ ايتقاندا، ۇلتتىق جەرسەرىكتىك بايلانىس جۇيەسى نەگىزىندە جەرسەرىكتىك بايلانىستىڭ جەردەگى جەلىسىن قۇرۋ، باسقارۋ نىساندارىندا اقپاراتتىق-تەلەكومۋنيكاتسيالىق ينفراقۇرىلىمداردى سالۋ، قورعانىس مينيسترلىگىنىڭ سيفرلىق عىلىمي-ەكسپەريمەنتالدى بازاسىن دامىتۋ، اقپاراتتىق قاۋىپسىزدىكتىڭ اسكەري-عىلىمي حابىن جاساقتاۋ جانە ارنايى ماقساتتاعى گەواقپاراتتىق پلاتفورمانى قۇرۋ»، - دەدى م. تالاسوۆ.

ونىڭ سوزىنشە، جوعارىدا اتالعان جوبالاردى جۇزەگە اسىرۋ قۇپيا اقپاراتتارمەن الماسۋدىڭ قاۋىپسىز جۇيەسى - مالىمەتتەرمەن الماسۋدىڭ تۇراقتى جۇيەسىنە نەگىزدەلگەن سيفرلىق قۇپيالاندىرىلعان قۇجات اينالىمىن قۇرۋعا سەپتىگىن تيگىزەدى. سونىمەن قاتار «سيفرلىق اسكەري ءبىلىم بەرۋ جانە عىلىم» جوبالارىن جۇزەگە اسىرۋ اسكەري ءبىلىم بەرۋ مەكەمەلەرىنىڭ بازاسىندا عىلىمي يننوۆاتسيالاردىڭ دامۋىنا جول اشادى.

ال «سيفرلى اسكەري مەديتسينا» اسكەري-مەديتسينالىق بولىمشەلەر مەن مەكەمەلەردە اسكەري قىزمەتكەرلەرگە جانە ولاردىڭ وتباسىلارىنا كورسەتىلەتىن مەديتسينالىق قىزمەتتەردىڭ ساپاسىن ارتتىرۋعا سەپتەسەدى.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى