قىرعىزستان ازاماتتاردىڭ كەلۋى تۋرالى قازاقستانمەن جاسالعان كەلىسىمدەگى وزگەرىستەردى بەكىتتى
قىرعىزستان رەسپۋبليكاسى پرەزيدەنتى اپپاراتىنىڭ اقپاراتتىق ساياسات ءبولىمى حابارلاعانداي، قىرعىزستان پرەزيدەنتى المازبەك اتامبايەۆ «2016 -جىلدىڭ 17 - قازان كۇنى استانا قالاسىندا قول قويىلعان 2012 -جىلدىڭ 11 - مامىرىنداعى قازاقستان ازاماتتارىنىڭ قىرعىزستان اۋماعىندا جانە قىرعىزستان ازاماتتارىنىڭ قازاقستان اۋماعىندا بولۋ ءتارتىبى تۋرالى قازاقستان رەسپۋبليكاسىنىڭ ۇكىمەتى مەن قىرعىزستان رەسپۋبليكاسىنىڭ ۇكىمەتىنىڭ اراسىنداعى كەلىسىمگە قوسىمشالار مەن وزگەرىستەر ەنگىزۋ تۋرالى حاتتامانى بەكىتۋ تۋرالى» قىرعىزستان رەسپۋبليكاسىنىڭ زاڭىنا قول قويدى.
زاڭ 2017 -جىلدىڭ 16 -ناۋرىزىندا جوگوركۋ كەنەشپەن (قىرعىزستان پارلامەنتى) قابىلداندى.
حاتتامانىڭ ماقساتى - قىرعىزستان ازاماتتارىنىڭ قازاقستان اۋماعىندا جانە قازاقستان ازاماتتارىنىڭ قىرعىزستان اۋماعىندا بولعان ۋاقىتتا قۇقىقتىق قاتىناستى رەتتەۋ بولىپ تابىلادى.
حاتتاماعا سايكەس، قازاقستان اۋماعىنا ۋاقىتشا كەلگەن قىرعىزستان ازاماتتارى قۇزىرەتتى ورگانداردا (تۇرعىلىقتى جەرى بويىنشا تىركەۋگە تۇرۋ) 30 كۇن بويى تىركەۋدەن بوساتىلادى.
زاڭ رەسمي جاريالانعاننان كەيىن جەتى كۇن وتكەن سوڭ كۇشىنە ەنەدى.
