ترامپ، سەنەن وباما جاقسى ەدى
رەسمي پحەنيان كارىس جاعالاۋىنا جاقىن كەلگەن وق تۇمسىقتارى بار ا ق ش- تىڭ ەكى الىپ كەمەسىن ەلەڭ ەتپەي، وسىنداي مالىمدەمە جاسادى.
«ەگەر امەريكالىق وق تۇمسىقتار كارىس جەرىنە قاراي باعىتتالاتىن بولسا، وندا ءبىز دە قول قۋسىرىپ قاراپ وتىرا المايمىز. ا ق ش ماجبۇرلەۋگە اپاراتىن بولسا، ءبىز سوعىسقا دايىنبىز، - دەپ مالىمدەدى 14- ءساۋىر كۇنى AP اگەنتتىگىنە سۇحبات بەرگەن سولتۇستىك كورەيا قورعانىس ءمينيسترىنىڭ ورىنباسارى حان سون رەل.
بۇل ورايدا حان سون رەل «كورەي تۇبەگىندەگى شيەلەنىسكەن ماسەلەنى ا ق ش- تىڭ ءوزى تۋدىرىپ وتىر. وعان ءبىزدىڭ ەش قاتىسىمىز جوق. ترامپ بيلىككە كەلگەننەن باستاپ ءبىزدىڭ ەلدى قىرىنا الا باستادى»، - دەدى.
شىندىعىندا، دونالد ترامپ ءوزىنىڭ «تۆيتتەردەگى» پاراقشاسىندا «سولتۇستىك كورەيا سىنىققا سىلتاۋ ىزدەپ ءجۇر. بىزگە قىتاي كومەكتەسسە، تاماشا بولار ەدى. ەگەر ولار قولداۋ كورسەتپەسە، پروبلەمانى ونسىز-اق شەشۋگە بولادى» دەپ جازدى.
ەرتەڭىنە قىتاي باسشىسىمەن تەلەفون ارقىلى تىلدەسكەننەن كەيىن ترامپ «قىتاي سولتۇستىك كورەيامەن قالىپتى جاعدايدا سويلەسە الادى» دەگەن ويدامىن. ەگەر ولاي ەتپەسە، ءبىز ءوز وداقتاستارىمىز ارقىلى جۇزەگە اسىرامىز» دەپ مالىمدەدى.
ءبىراق ودان ىعىپ وتىرعان كيم چەن ىن جوق.
- ءبىز قازىرگى ۋاقىتتا باراك وباما مەن دونالد ترامپتىڭ سىرتقى ساياساتتاعى ارەكەتىن سالىستىرىپ وتىرمىز. وبامامەن سالىستىرعاندا، ترامپتىڭ ساياساتى وتە قاتال. ەگەر سولتۇستىك كورەيا ەلىندەگى رەجيمدى ولار اۋىستىرۋعا نيەتتەنسە، ءبىز ولارعا دەرەۋ تويتارىس بەرەمىز ، - دەپ جاۋاپ بەردى قورعانىس ءمينيسترىنىڭ ورىنباسارى حان سون رەل.
ارينە، سوعىستىڭ بەتىن ارى قىلسىن؟! ءبىراق سيريانىڭ «شايران» اسكەري اۋەجايىنا تۇتقيىلدان سوققى بەرىپ، تالايدىڭ ارەكەتىن تىعىرىققا تىرەگەن ترامپ بۇل جولى شابۋىل جاساي الا ما؟
قازىردىڭ وزىندە پحەنيان سوعىسقا تاس-ءتۇيىن دايىن تۇر. ەلدىڭ باس قالاسىنداعى 600 مىڭداي ادامدى دەرەۋ باسقا جەرگە كوشىردى. اتاسى كيم ير سەننىڭ تۋعانىنا 105 جاسقا تولۋ قۇرمەتىنە التىنشى رەت يادرولىق قارۋدى سىناق وتكىزبەك بولىپ وتىرعان كيم چەن ىن اسكەريلەرگە سوعىسقا دايىن تۇرۋعا بۇيرىق بەردى.
...جاعداي وتە قيىن. سوعىس كىمگە وپا بەرگەن؟ ءبارى رەتتەلەتىن شىعار. ءبىراق ءبىر نارسە ايقىن، سولتۇستىكتەگى كارىستەر «ترامپ، سەنەن وباما جاقسى ەدى...» دەپ بەكەر ايتىپ وتىرعان جوق.
بەرىك بەيسەن ۇلى
«ايقىن»
