اقتوبە قالاسىندا توتەنشە جاعداي جاريالاندى - كەسكىن
قازىرگى ۋاقىتتا ەڭ ءىرى قارعالى سۋ قويماسىنداعى سۋدى جىبەرۋ جوسپارلانىپ وتىر، دەپ حابارلايدى قازاقپارات ءتىلشىسى.
اقتوبە قالاسىنداعى جاعداي ءالى تۇراقتالار ەمەس. سۋ تاسقىنىنا قارسى شتاب بۇگىن قالالىق اكىمدىككە شۇعىل جينالىپ، جيىن وتكىزدى. قازىرگى ۋاقىتتا سازدى، اقتوبە، قارعالى سۋ قويمالارى تولىپ، ەڭ ءىرى قارعالى سۋ قويماسىن اشۋ جوسپارلاندى.
ال ەلەك، قارعالى، سازدى، جىڭىشكە وزەندەرى تاۋلىگىنە 40-90 سانتيمەترگە دەيىن كوتەرىلىپ تۇر. وسىعان وراي اكىمدىك توتەنشە جاعداي جاريالاپ، كوميسسيا قۇرۋعا شەشىم قابىلدادى. «قازىرگى كەزدە 290 ساياجاي مەن اۋلا سۋعا كەتتى. باۋ- باقشا ۇجىمىنداعى 5 ءۇي قۇلاپ قالدى. بارلىعى 700 دەن استام ادام ەۆاكۋاتسيالانىپ، قۇتقارىلدى. ولاردىڭ اراسىندا بالالار مەن مۇگەدەك ادامدار دا بار. ەۆاكۋاتسيالانعان ادامداردى ۋاقىتشا قونىستاندىرۋ ءۇشىن 12 بەكەت جۇمىس ىستەر تۇر. ورتا مەكتەپتەردە 200-گە جۋىق ادام قونىستاندى. وزگەسى تۋما- تۋىستارىنىڭ ۇيىنە كەتتى»، - دەپ حابارلادى وبلىستىق توتەنشە جاعدايلار قىزمەتىنىڭ باسپا ءسوز قىزمەتى.
مالىمەتكە سۇيەنسەك، سۋ تۇندە كوتەرىلىپ، كۇندىز كەرى قايتىپ تۇر. اقتوبەدەگى جەرگىلىكتى بيلىك توتەنشە جاعداي جاريالانعاندىعى تۋرالى اقپاراتتى الەۋمەتتىك جەلىلەر ارقىلى تاراتىپ، كۇزەت جۇمىستارىن كۇشەيتتى. سۋدان قۇتقارۋ جۇمىستارىنا توتەنشە جاعدايلار قىزمەتىنىڭ 85 ادامى مەن 20 تەحنيكا جۇمىلدىرىلعان.
ال ىشكى ىستەر دەپارتامەنتى 120 دان استام ادام مەن 63 تەحنيكانى بەردى. سونىمەن قاتار، ۇرمەلى قايىقتار مەن جەكە مەنشىك كومپانيالاردىڭ اۋىر تەحنيكالارى قۇرقارۋ جۇمىستارىن جۇرگىزىپ جاتىر. «وبلىستا 13 سۋ تاسقىنىنا قارسى شتاب قۇرىلدى. قۇتقارۋشىلار ءبىر تاۋلىكتە 2 مىڭنان استام قۇممەن تولتىرىلعان قاپتى توسەدى. وبلىستىق توتەنشە جاعدايلار قىزمەتى كەشە قارعالى مەن اقتوبە سۋ قويماسىن تىكۇشاق ارقىلى باقىلادى. ولشەۋ قۇرالدارى قوندىرىلىپ، جەرگىلىكتى پوليتسيا قىزمەتى كەزەكشىلىككە كوشتى. سۋعا كەتۋ ءقاۋپى باسىم اۋماقتا ماحامبەتوۆكا اۋىلى، كىرپىشتى اۋىلىنىڭ كوپىر ماڭى، زارەچنىي-2 اۋىلى مەن بىرنەشە باۋ- باقشا ۇجىمى بار»، - دەپ حابار تاراتتى وبلىستىق توتەنشە جاعدايلار دەپارتامەنتى.
ايتا كەتەيىك، اقتوبە قالاسىندا مۇنداي جاعداي سوڭعى رەت 1996 -جىلى تىركەلگەن ەكەن. سۋدان قۇتقارۋ جۇمىستارىنا قالا بويىنشا 450 ميلليون تەڭگە ءبولىندى.
اۆتور: التىناي ساعىندىقوۆا
