جاڭا الىپبيگە كوشۋ قازاقستان ءۇشىن ايقىن باعىت - پروفەسسور تەلەبايەۆ
بۇل تۋرالى ق ر تۇڭعىش پرەزيدەنتى - ەلباسىنىڭ كىتاپحاناسىنىڭ الەۋمەتتىك- اعارتۋشىلىق جوبالار قىزمەتىنىڭ جەتەكشى عىلىمي قىزمەتكەرى، پروفەسسور عازيز تەلەبايەۆ ءمالىم ەتتى، دەپ حابارلايدى قازاقپارات.
«رۋحاني جاڭعىرۋ ءاربىر ازاماتقا قاتىستى. وسى رەتتە جاستاردىڭ ساناسىنىڭ جاڭعىرۋى وتە ماڭىزدى دەپ ەسەپتەيمىن. سونىمەن قاتار پرەزيدەنت وسى سانانى وزگەرتەتىن قانداي ناقتى شارالار ىسكە اسىرىلۋى كەرەكتىگىن ايقىندادى. بۇل تۇرعىدا التى ۇلكەن جوبا ۇسىنىلعانىن بىلەسىزدەر. ەندى بەرىلگەن تاپسىرمالارعا قاتىستى ۇكىمەت ءتيىستى قادامدارعا كىرىسەدى. التى تاپسىرمانى ورىنداۋدا ءبىزدىڭ كىتاپحانا دا ءوز ۇلەسىن قوساتىن بولادى»، - دەپ توقتالدى تەلەبايەۆ «قازاقپاراتقا» بەرگەن سۇحباتىندا.
وسى ورايدا ەلباسىنىڭ لاتىن الىپبيىنە كوشۋدىڭ ناقتى كەستەسىن ازىرلەۋ تاپسىرماسىنا توقتالعان ول، «بىرىنشىدەن، لاتىن قارپىنە كوشۋ ارقىلى تۇركى ەلدەرىمەن جاقىنداي تۇسەمىز. تەك قانا ساياسي، ەكونوميكالىق تۇرعىدان عانا ەمەس، سونىمەن قاتار رۋحاني جاعىنان دا ءبىر الەمدە بولامىز. تۇركى الەمىنە جاقىنداۋدان ءبىز ۇتىلمايتىنىمىز انىق. ويتكەنى تۇركى حالىقتارىمەن ءتىلىمىز، ءدىنىمىز جانە مادەنيەتىمىز ءبىر. سول سەبەپتەن بۇل دۇرىس ءۇردىس دەگەن ويدامىن»، - دەدى.
عالىمنىڭ پايىمىنشا، قازاقستان حالقى زاماناۋي ءالىپبيدى قولدانۋى ءتيىس. لاتىن قارپى ارقىلى زاماناۋي ۇردىستەردەن كەيىن قالماۋعا مۇمكىندىك بولادى. ايتا كەتەيىك، ق ر پرەزيدەنتى نۇرسۇلتان نازاربايەۆ «ەگەمەن قازاقستان» گازەتىنە شىققان ماقالاسىندا لاتىن الىپبيىنە كوشۋدىڭ ناقتى كەستەسىن ازىرلەۋدى تاپسىرعان بولاتىن.
ەلباسى 2017 -جىلدىڭ اياعىنا دەيىن عالىمداردىڭ كومەگىمەن، بارشا قوعام وكىلدەرىمەن اقىلداسا وتىرىپ، قازاق ءالىپبيىنىڭ جاڭا گرافيكاداعى ءبىرىڭعاي ستاندارتتى نۇسقاسىن قابىلداۋ كەرەكتىگىن دە جەتكىزدى. ال 2018 -جىلدان باستاپ جاڭا ءالىپبيدى ۇيرەتەتىن مامانداردى جانە ورتا مەكتەپتەرگە ارنالعان وقۋلىقتاردى دايىنداۋعا كىرىسكەن دۇرىس دەپ سانايدى.
اۆتور: رۋسلان عابباسوۆ
