ديماش وسى ۋاقىتقا دەيىن جەڭىمپاز ەكەنىن دالەلدەپ شىقتى - ۇستازى مارات ايتىموۆ
ديماش قۇدايبەرگەننىڭ ۇستازى مارات ايتىموۆ الىستاعى شاكىرتىمەن ۇنەمى بايلانىسىپ وتىرادى. ۇستاز بەن شاكىرت ءبىر-ءبىرىن تۇسىنەدى، ءسوزسىز ۇعىنادى. اسىرەسە، اپتا سايىن جاڭا ءان ورىنداپ، ۇلكەن سىناقتان وتكەن ديماش ءۇشىن ۇستازىنىڭ اقىل-كەڭەسى اۋاداي قاجەت بولدى.
«ول ءار اپتا سايىن حابارلاسىپ وتىردى دەسەم، ارتىق ايتقان بولامىن. ديماش پسيحولوگيالىق جاعىنان قولداۋ كەرەك بولعان كەزدە حابارلاسادى. ءيا، ديماش ءۇشىن بارلىق جاعداي جاسالعان. ءبىراق ول شەتەلدە ءجۇر. ءارى جاڭا ءان جاتتاۋ دەگەن وڭاي شارۋا ەمەس. كەيبىر اندەر ادامنىڭ داۋىسىنا جاتۋ ءۇشىن ايلار كەرەك بولادى. ال بۇل ارادا ءبىر اپتانىڭ ىشىندە ءبىر ءان دايىنداۋ قاجەت. ول وڭاي شارۋا ەمەس. سونىمەن قاتار، كونكۋرس ادامنىڭ جۇيكەسىنە اسەر ەتەدى. ونىڭ شارشاپ جۇرگەنىن اقتوبەگە كەلىپ، كەتكەن كەزىندە بايقاعانمىن»، - دەدى مارات ايتىموۆ.
ديماش قۇدايبەرگەن بايقاۋ كەزىندە ازيانىڭ ەڭ تانىمال ءانشىسى، حالىقارالىق دەڭگەيدە تانىمال ءانشى اتاندى. مۇنىڭ ءبارى كونكۋرس اياسىندا قول جەتكىزگەن جەتىستىگى.
«از ۋاقىت ىشىندە ديماش تانىمال بولدى، بيىككە كوتەرىلدى. بيىككە كوتەرىلۋ وڭاي شارۋا ەمەس. ونداي نارسەنى 22 جاستاعى جاس جىگىت تۇگىلى، جاسى ۇلكەن ادامنىڭ ءوزى دە كوتەرە الماي قالۋى مۇمكىن. ديماشتىڭ جاعدايىن 200 پايىزعا تۇسىنەمىن»، - دەدى ۇستازى.
مارات ايتىموۆتىڭ ايتۋىنشا، قىتايداعى بايقاۋ ديماشتىڭ حالىقارالىق دەڭگەيدە باعىن اشقان. بۇعان دەيىن «سلاۆيان بازارىنا»، «شىعىس بازارىنا» قاتىسىپ، جەڭىسكە جەتكەنى ءبىر بولەك.
سەبەبى ول بايقاۋلار بۇرىنعى كەڭەس ۇكىمەتىنىڭ ەلدەرىندە ءوتتى. ال قىتاي ەلىنىڭ ساحناسى ديماشتىڭ دەڭگەيىن كوتەرىپ، الەمگە تانىلۋىنا سەپتىگىن تيگىزدى.
«جالپى ديماش اناۋ-مىناۋ ادام ەمەس. ءوزىم بالالارىمدى ونشا ماقتامايمىن. ءبىراق مويىنداۋ كەرەك. ەرتەڭ ول جەڭسە جەڭەر، جەڭبەسە جەڭبەس، ءبىراق ءبارىبىر وسى ۋاقىتتا جەڭىمپاز ەكەنىن دالەلدەپ شىقتى»، - دەدى مارات ايتىموۆ.
عازيزا جۇبانوۆا اتىنداعى وبلىستىق فيلارمونيا مەن احمەت جۇبانوۆ اتىنداعى مۋزىكالىق كوللەدجدە جۇمىس ىستەپ جۇرگەن ۇستازعا بىرەر ايدا رەسەي مەن قىرعىزستان ستۋدەنتتەرى حابارلاستى.
ولار الەمگە تانىمال شاكىرت تاربيەلەگەن ۇستازدان ءتالىم الىپ، ونەرىن شىڭداعىسى كەلەدى. ءوز ءىسىنىڭ شەبەرى، ۇستاز بۇل ۇسىنىستاردىڭ بارىنەن باس تارتتى. «ستۋدەنتتەردىڭ بارلىعى ءوز ەلىندەگى جوعارى وقۋ ورنىندا ءبىلىم الادى. ءبىزدىڭ اقتوبەدە جوعارى ءبىلىمدى ءانشى دايىندايتىن وقۋ ورنى جوق. ولارعا وسىنى ءتۇسىندىرىپ ايتتىم. سونىمەن قاتار، «بالامدى تاربيەلە» دەپ ۇسىنىس ايتاتىندار كوبەيدى.
ءبىراق كەلىسپەدىم. ۋاقىتىم جوق. بۇرىننان كوپ ەدى، قازىر ءتىپتى كوپ. كىشكەنتاي بالالار دا، جاسى ۇلكەن اپالار مەن اعالار دا بار. «جاقسىلاپ تولەيمىز، دايىندا» دەپ ايتادى. ەشتەڭەنىڭ ءمانىسىن بىلمەيتىن ادامدار عانا «ءبىر ايدا ءبارىن ۇيرەنىپ شىعام» دەپ ويلاۋى مۇمكىن. بۇل دەگەن اۋىر، بەينەتتى ەڭبەك. سوندىقتان ساباق بەرەتىن ستۋدەنتتەرىمنەن، فيلارمونياداعى جۇمىسىمنان اۋىسپايمىن. الداعى 6-7 اي كولەمىندە جەكە ساباق بەرمەيمىن»، - دەدى م. ايتىموۆ.
