ديماش قۇدايبەرگەن اقتىق سىندا قىتايدىڭ «لەدي گاگاسىمەن» بىرگە ءان ايتادى

 «سوڭعى ءۇش ايدان بەرى قازاقستاندىقتار «چاڭشا»، «حۋنان ت ۆ»، «ديماشي» دەگەن سوزدەردى ءجيى ەستيتىن بولدى. حۋنان پروۆينتسياسىنىڭ اكىمشىلىك ورتالىعى -  چاڭشادا قىتاي كوسەمى ماۋ زىدۇڭنىڭ ساياسي مانسابى باستالعان. مىناۋ -  سونىڭ قۇرمەتىنە قويىلعان قۇنى 35 ميلليون دوللارعا شىققان، بيىكتىگى 32 مەترلىك قىزىل گرانيتتان جاسالعان ەسكەرتكىش. ءدال وسى ەلدى مەكەندە قازاقتىڭ ديماشىنىڭ داۋىسى ميللياردقا تانىلدى.

 67 ميللين تۇرعىنى بار حۋنان پروۆينتسياسىندا 20 تەلەارنا جۇمىس ىستەيدى. سونىڭ ىشىندە تارالىمى مەن رەيتينگى جاعىنان وزىق تۇرعانى -  «حۋنان» تەلەارناسى. 19 مىڭ ادام ەڭبەك ەتەتىن اقپارات قۇرالى. نەگىزىنەن ويىن- ساۋىق باعدارلاما تۇسىرەدى. تەك ديماش قاتىسىپ جاتقان «مەن ءانشىمىن» بايقاۋىنىڭ بيۋدجەتى 30 ميلليون دوللارعا جۋىق.

 ديماش اقتىق سىنعا دايىندىعىن پىسىقتاپ جاتىر. فينالدا قىتايدىڭ «لەدي گاگاسى» سانالاتىن شان ۆەنتسزەمەن ساحناعا شىعادى. ولار مايكل دجەكسوننىڭ الەمگە تانىمال اندەرىن ايتادى.  2006 -جىلى وسى تەلەارنادا «سۋپەر گيرلز» بايقاۋىندا جەڭىپ شىققان شان ۆەنتسزە ديماشتىڭ ساحناداعى ەنەرگەتيكاسى وتە كۇشتى دەپ باعالايدى.

 شان ۆەنتسزە، ءانشى:

 - ديماش -  مۋزىكا سالاسىنا توڭكەرىس اكەلگەن تالانتتى ءانشى. ونىڭ مۋزىكالىق بىلىمىنە تاڭداي قاقپاسقا امالىم جوق. ونىڭ بويىنداعى ەنەرگيانى بۇرىن- سوڭدى سەزگەن ەمەسپىن. ارينە، ديماشتىڭ وتانى -  قازاقستان. ونى ماپەلەپ وسىرگەن جەر -  قازاقستان. دەگەنمەن مۇنداي دارىندى انشىگە قىتايدا ۇلكەن ساحنا بار، ونىڭ ميلليونداعان تىڭدارمانى دا وسىندا. ءبىز ديماشپەن بىرلەسىپ، قىتايدا ۇلكەن جوبالاردى جۇزەگە اسىرساق دەيمىز.

«بايقاۋدىڭ فينالىندا وسال ءانشى جوق. دەگەنمەن ءبىز جەڭۋ ءۇشىن ساحناعا شىعامىز»، -  دەيدى شان. ديماش قۇدايبەرگەننىڭ جانكۇيەرلەرى دە «ءان پاتشاسى» اتاعىنا، قازاقستاندىق ءانشى لايىق دەپ سانايدى. ءبىز فاناتتاردان بولەك، چاڭشا كوشەسىنە شىعىپ، حالىقتىڭ پىكىرىن سۇرادىق.

نۇربەك بەكەن، «حابار 24» ارناسىنىڭ قىتايداعى ءتىلشىسى:

- سالەمەتسىز بە، ءبىز «حابار 24» تەلەارناسىنان ەدىك. ءسىزدىڭ پىكىرىڭىزدى بىلسەك دەيمىز. ديماشتىڭ بايقاۋدا جەڭىمپاز اتانۋعا مۇمكىندىگى بار ما؟

 چاڭشا تۇرعىنى:

- ديماش قىتاي ساحناسىندا پايدا بولعالى «ۇلكەن جارىلىس» جاسادى. بىردەن كورەرمەندەردى باۋراپ، ءان ايتۋ مانەرىمەن ەرەكشە كوزگە ءتۇستى. ونىڭ ءبىرىنشى ورىن الاتىنىنا ەش كۇمانىم جوق. ول قىتاي اندەرىن شىرقاۋدا جاڭا باعىت اكەلدى. بۇل جەرگىلىكتى تىڭدارمان ءۇشىن توسىن سىي بولدى.

جەڭىمپاز ەرتەڭ بەلگىلى بولادى. بايقاۋدى باسىنان اياق تاماشالاپ كەلە جاتقان 500 كورەرمەن داۋىس بەرۋ ارقىلى «ءان پاتشاسىن» انىقتايدى. ولاردى ۇيىمداستىرۋشىلار ينتەرنەتتەن ارنايى ساۋالناما ارقىلى ىرىكتەپ العان. داۋىس بەرەتىن كورەرمەننىڭ قانداي دا ءبىر انشىگە بۇيرەگى بۇرمايتىنى، تاۋەلسىز پىكىر ايتاتىنىن تاڭداعان. اراسىندا انشىگە ساۋاتتى باعا بەرە الاتىن كاسىبي ماماندار دا بار.

 اۆتورلارى: ن. بەكەن، ج. ءسۇي

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى