نۇرسۇلتان نازاربايەۆ ديماش تۋرالى «بالاعا قاراڭدار» دەپ تاپسىرما بەرگەن
وسىعان دەيىن قازاقستاننىڭ حالىق ءارتىسى روزا رىمبايەۆا «ديماشتىڭ ەلىمىزدە سۇيىكتى ءانشى اتانۋىنا مۇمكىندىگى از» دەگەن پىكىر ايتقان بولاتىن. ال ەلىمىزدەگى ەڭ تانىمال، جاستاردىڭ سۇيىكتى ءانشىسى قايرات نۇرتاس بولسا «ديماش ءوز ءانىن تاپپاعاندىقتان ەلدە باعالانبادى» دەپ ءوز ويىن ءبىلدىردى.
سودان سوڭ قازاق ەستراداسى جۇلدىزدارىنىڭ ايتقانى الەۋمەتتىك جەلىدە قىزۋ تالقىعا تۇسكەن ەدى. الايدا، ۇلتتىق ونەر ۋنيۆەرسيتەتىنىڭ وقىتۋشىسى مايرا ءىلياس قىزى بۇل پىكىرلەرمەن كەلىسپەيتىندىگىن جەتكىزدى. ونىڭ پىكىرىنشە، ديماش قۇدايبەرگەننىڭ ونەرى ەلىمىزدە دە جوعارى باعالاناتىن بولادى.
«جوق، ول پىكىرگە قارسىمىن. روزانىڭ دا، قايراتتىڭ دا جاناشىرلىق ءبىلدىرىپ جاتقانى وتە دۇرىس. قازىرگى تاڭدا ءبىزدىڭ ەلباسى نۇرسۇلتان نازاربايەۆ «بالاعا قاراڭدار» دەپ ۇلتتىق ونەر ۋنيۆەرسيتەتىنىڭ رەكتورى ايمان مۇساقوجايەۆاعا، ءارى مادەنيەت جانە سپورت ءمينيسترى ارىستانبەك مۇحامەدي ۇلىنا ارنايى تاپسىرما بەرگەن بولاتىن.
ولار بالانى قامقورلىعىنا الىپ وتىر. مەنىڭ ويىمشا، وسىنى ەسكەرە كەلە، مۇنداي جاعداي بولمايدى. دۇنيەجۇزى ونى مويىنداپ، ۇلكەن مۋزىكا ماماندارى ءوز باعالارىن بەرىپ جاتقان كەزدە ءبىزدىڭ ديماشتىڭ ونەرى ەلىمىزدە باعالانادى» ، - دەدى ول.
وسى ورايدا تانىمال ءانشى ديماشتىڭ تالانتى بۇرىننان ەلىمىزدە جوعارى باعالانعانىن دا اتاپ ءوتتى.
«حالىق بۇرىننان دا باعاسىن بەرىپ ءجۇر. ونىڭ وسى ءبىلىم ورداسىنا تۇسكەنىنىڭ ءوزى ەڭبەگىنىڭ جوعارى باعالانعانى. سونداي- اق، ەلىمىزدەگى ۇلكەن شوۋ باعدارلامالارعا ءبىزدىڭ ديماش قاتىسىپ جاتادى. ءتىپتى، ول مەملەكەتتىك دارەجەدەگى ماڭىزدى كونسەرتتەردە، ەلباسىنىڭ الدىندا اندەرىن ايتىپ ءجۇر.
ارينە، ديماش وسىدان 1-2 جىل بۇرىن جاس بولدى. قازىر ول تاجىريبە جيناقتاپ جاتىر. ول قىتاي حالىق رەسپۋبليكاسىنداعى تاماشا باعدارلاماعا قاتىسىپ، «ازيانىڭ ەڭ ۇزدىك ءانشىسى» اتاندى. وسىنىڭ بارلىعى ونىڭ ەڭبەگىنىڭ باعالانۋى» ، - دەدى ءانشى.
Baq.kz
