اقتوبەلىكتەر ديماشتى قولداۋ اكسياسىن وتكىزىپ جاتىر

كەشە كىتاپحانا ۇجىمى ارنايى اكسيا وتكىزسە، بۇگىن، 14 -ساۋىردە ورتالىق ساياباقتا ۇلكەن كەش ۇيىمداستىرىلادى، دەپ حابارلايدى قازاقپارات ءتىلشىسى.

اقتوبەلىكتەر ديماش قۇدايبەرگەندى قولداۋ ماقساتىندا ۇلكەن باننەرلەردى ءىلىپ، قازاق بالاسىنىڭ جەتىستىگى مەن جەڭىسىنە ءتانتى بولىپ جاتىر. قازىر ديماشتىڭ سۋرەتى بەينەلەنگەن باننەرلەر اۋدان ورتالىقتارىندا دا ءىلۋلى تۇر. «Singer 2017» ءان بايقاۋىنىڭ فينالىنا بىرەر كۇن قالعاندا ساقتاعان بايىشەۆ اتىنداعى اقتوبە وبلىستىق امبەباپ عىلىمي كىتاپحاناسىنىڭ ۇجىمى وبلىستىق مادەنيەت باسقارماسىنىڭ قولداۋىمەن ارنايى اكسيا ۇيىمداستىردى.

كىتاپحاناشىلار ديماشتىڭ ورىنداۋىنداعى ءاندى تىڭداپ، «ديماش، العا!» دەپ ۇرانداتتى. «ءبىز ديماشقا سالەمىمىزدى جولداپ، ۇلكەن سىن الدىندا كۇش-قۋات بەرگىمىز كەلدى. ەل بولىپ جاس ونەرپازىمىزدىڭ تىلەۋىن تىلەپ وتىرمىز. ول ناعىز تالانت. ال ناعىز تالانت قاي ەلدە تۋسا دا جەردە جاتپايدى، جارق ەتىپ كورىنەدى»، - دەيدى كىتاپحانا قىزمەتكەرى تالعات تىلەۋلەسوۆ. اقتوبەلىكتەر بۇگىن كەشكە ۇلكەن كەش ۇيىمداستىرادى. وبلىستىق مادەنيەت جانە مۇراعاتتار باسقارماسىنىڭ باسشىسى مارجان قورعانبايەۆانىڭ ايتۋىنشا، جەرگىلىكتى ونەرپازدار ءان ايتىپ، ديماشتىڭ ۇستازدارى تىلەك تىلەيدى. ۇستازى مارات ءايتىموۆ ونەر كورسەتەدى.

«تۇڭعىش پرەزيدەنت اتىنداعى ورتالىق ساياباقتا وتەتىن شوۋ كونسەرتتە ديماشتىڭ اتا-اجەسى اق باتاسىن بەرەدى. ال جەرگىلىكتى ءبي ۇجىمدارى ديماشتىڭ ورىنداۋىنداعى اندەرگە بيلەيدى. وسىلايشا اقتوبەنىڭ سالەمدەمەسىن الەۋمەتتىك جەلى ارقىلى ديماشقا جەتكىزگىمىز كەلەدى»، - دەدى م. قورعانبايەۆا.

اۆتور: التىناي ساعىندىقوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى