امانگەلدى ايتالى: ۇلتتىق قۇندىلىقتى ناسيحاتتاۋ - وركەنيەت قۇندىلىقتارىنان باس تارتۋ ەمەس
«بۇگىنگى جاھاندانۋ زامانىندا كوپتەگەن مەملەكەتتەر ۇلتتىق قۇندىلىقتارىنا الاڭداپ وتىر. اعىلشىن ءتىلىنىڭ قۋاتى، الەمدىك بۇقارالىق اقپارات قۇرالدارىنىڭ تاسقىنى ءوسىپ تۇرعان جاعدايدا ەلدىڭ ۇلتتىق قۇندىلىعى، ونىڭ تاعدىرى قالاي بولادى دەگەن ماسەلە كوپتەگەن مەملەكەتتى مازالايدى. سونىڭ ءبىرى - ءبىز. قۇندىلىقتار دەگەنىمىز ۇلتتى ۇلت ەتەتىن قاسيەتتەر. پرەزيدەنت ءوز ماقالاسىندا ۇلتتىق رۋحاني كود تۋرالى جازدى. بۇل «قازاقتى قازاق ەتەتىن قانداي قۇندىلىقتار، قانداي مادەنيەتتىڭ باعىتتارى» دەگەن ءسوز. ءبىز تەك تاماعىمىزدىڭ توقتىعىنا ءماز بولماي، رۋحىمىزدىڭ كۇشتىلىگىنە، قادىر- قاسيەتىمىزدىڭ مولدىعىنا بۇگىن ءمان بەرۋىمىز كەرەك. ونىڭ بارلىعى ادامعا كەلىپ تىرەلەدى. ادامعا تەك جۇمىس كۇشى، ماتەريالدىق ءوندىرىستى، يگىلىكتەردى شىعاراتىن تۇلعا دەپ ەمەس، قوعامنىڭ ماڭىزدى كۇشى، رۋحى بيىك تۇلعا، رۋحى بيىك قازاق، رۋحى بيىك قازاقستان مەملەكەتىنىڭ ازاماتى دەپ قاراۋىمىز كەرەك. وسى رۋحتى قالاي، قانداي جولمەن تاربيەلەيمىز دەپ پرەزيدەنت حالىقپەن اقىلداسىپ، ءوز ويىمەن ءبولىسىپ وتىر. نەگىزگە ءمانى وسىندا»، - دەدى قوعام قايراتكەرى امانگەلدى ايتالى.
فيلوسوفيا عىلىمدارىنىڭ دوكتورى، پروفەسسور امانگەلدى ايتالى الەمدىك جاھاندانۋ كەزىندە قازاقتى ۇلت رەتىندە ساقتاپ قالاتىن بىرنەشە فاكتورعا توقتالدى.
«بىرىنشىدەن، قازاقتىڭ ءتىلى، ەكىنشىدەن، قازاقتىڭ مۇسىلماندىعى مەن ءداستۇرى، قازاقتىڭ مول رۋحاني بايلىعى. سول رۋحاني بايلىقتى، قۇندىلىقتى قازاقتىڭ بويىنا دارىتۋ كەرەك. ءبىراق ۇلتتىق قۇندىلىقتارىمىزدى قۇرمەتتەيمىز دەپ ەسكىنىڭ ءبارىن ناسيحاتتاي بەرۋدىڭ قاجەتى جوق. ءبىزدىڭ كادەمىزگە جارايتىنىن الامىز. ۇلتتىق قۇندىلىقتى ناسيحاتتايمىز دەپ الەمدىك وركەنيەت قۇندىلىقتارىنان باس تارتپايمىز. ەكىجاقتى دا بەلگىلى ءبىر بالانستا ۇستاپ، ەلىمىزدىڭ مادەنيەتىن، رۋحاني باعىتىن ۇستاي ءبىلۋىمىز كەرەك دەپ ويلايمىن. بۇل تۋرالى وسى ۋاقىتقا دەيىن ايتىلدى. «مادەني مۇرا» باعدارلاماسى بولدى، ءبىرقاتار شارالار جاسالدى»، - دەدى امانگەلدى ايتالى.
اۆتور: التىناي ساعىندىقوۆا
