قارجاۋباي سارتقوجا ۇلى: لاتىن ءالىپبيىن قۇراستىرۋدا دىبىستاردىڭ جوعالۋىنا جول بەرمەۋ قاجەت

بۇگىن ق ر ءبىلىم جانە عىلىم مينيسترلىگىنىڭ عىلىم كوميتەتىنە قاراستى مەملەكەت تاريحى ينستيتۋتىندا وتكەن دوڭگەلەك ۇستەلدە ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە تۇركى تانۋ، التايتانۋ عىلىمي زەرتتەۋ ينستيتۋتىنىڭ ديرەكتورى، فيلولوگيا عىلىمدارىنىڭ دوكتورى، پروفەسسور قارجاۋباي سارتقوجا ۇلى وسىنداي پىكىر ءبىلدىردى.

«لاتىن قارپىنە اۋىسۋ كورشىلەس رەسپۋبليكالاردا اكىمشىلىك ادىسپەن وتە اسىعىس جۇرگىزىلدى. ءبىز سەكىلدى زەرتتەۋ جاساعان جوق. ءبىزدىڭ عالىمدار ءتىلىمىزدىڭ ارتيكۋلياتسياسىنا بايلانىستى وتە كوپ زەرتتەۋ جاسادى. اسىرەسە، سوڭعى بەس جىلدا عالىمدار بەلسەندى جۇمىس ىستەدى، جۋرناليستەر مەن جازۋشىلار اقىل- كەڭەستەرىن ايتتى، لاتىن الىپبيىنە كوشەر بولساق، قانداي شريفتىلەردى، كەسكىن- تاڭبالاردى الۋ قاجەت، قاي دىبىستى قاي تاڭبامەن بەلگىلەۋ كەرەك تۋراسىندا قىزۋ پىكىرتالاستار ءجۇردى»، - دەپ پروفەسسور قازاقستاندىق عالىمداردىڭ اتقارعان جۇمىستارىن اتاپ ءوتتى جانە جاڭا ءالىپبي قۇرۋ كەزىندە ءتول دىبىستاردى جوعالىپ الۋعا جول بەرمەۋ قاجەتتىگىن ەسكە سالدى.

«وتكەن عاسىردا تۇركىنىڭ كەيبىر حالىقتارى «ڭ»، «ع» ارىپتەرىن ايىرىلىپ قالدى. قازاققا قاتتى ۇقسايتىن نوعاي حالقى «ج» دەپ سويلەيتىن. كەڭەس ۇكىمەتى تۇسىندا ورىستىڭ باسكاكوۆ اتتى تانىمال عالىمى كوممۋنيستىك پارتيا نۇسقاۋىمەن ون جەتى تۇركى حالقىنىڭ ءالىپبيىن قۇراستىردى جانە نوعايلاردىڭ «ج» دىبىسىن جوعالتىپ جىبەردى. قازىرگى نوعايلاردىڭ جىلقىنى- يىلقى، جاستى- ياش، جاماندى- يامان دەپ جۇرگەنى سودان. تۇبىندە باسكاكوۆ 92 جاسىندا ساياساتتىڭ كەسىرىنەن قيانات جاسادىم دەپ نوعاي حالقىنان كەشىرىم سۇرادى. سوندىقتان، كەلەشەك ۇرپاققا امانات بوپ قالاتىن جاڭا ءالىپبيدى قۇراستىرۋدا اسا مۇقيات بولعان ءجون»، - دەدى قارجاۋباي سارتقوجا ۇلى.

اۆتور: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى