اسانالى ءاشىموۆ: ەلباسى ماقالاسى ماڭىزدى، ەندى سوزدەن ىسكە كوشەيىك

ايتا كەتەيىك، بۇگىن الماتىدا زيالى قاۋىم وكىلدەرى كەشە، 12- ءساۋىر كۇنى «ەگەمەن قازاقستان» رەسپۋبليكالىق گازەتىندە جاريالانعان ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىن تالداۋعا ارنالعان دوڭگەلەك ۇستەل باسىنا جينالدى.

جيىندا اسانالى ءاشىموۆ ماقالانىڭ ماڭىزدىلىعىنا توقتالدى. «دامىعان ەلدە رۋحانيات ءبىرىنشى ورىندا تۇرادى. رۋحانيات بارلىق ادامعا ازىق. ەلباسى ماقالاسى وتە ماڭىزدى ءارى كۇردەلى. بۇعان دەيىن ساياسي، ەكونوميكالىق ماسەلەلەر كوبىرەك قوزعالىپ كەلدى، بۇل جولى ەلباسىمىز رۋحاني جاڭعىرۋ ماسەلەسىن كوتەرىپ وتىر. جۇرەگىمىزگە قوندى. ەندى سوزدەن ىسكە كوشۋ كەرەك»، - دەدى قازاق كينوسىنىڭ ارداگەرى.

سونىمەن قاتار، ول لاتىن ارپىنە كوشۋگە قاتىستى ءوز ويىن ايتتى. «لاتىنعا كوشۋ قانشالىقتى كەرەك، قانشالىقتى كەرەكسىز، وسىنى تالداۋىمىز كەرەك. ەلباسى تۋعان جەرگە قامقورلىق تۋرالى، قالا مەن دالانىڭ اراسىن جاقىنداتايىق دەگەن ماسەلەنى ايتىپ وتىر. بۇل قازىرگى جاعدايدا كەرەك دۇنيە. لاتىن قارپىنە كوشۋ تۋرالى ونى قۇراستىرۋشىلار ايتادى: «لاتىن قارپى تەك قازاق مەكتەپتەرىندە عانا بولادى. بۇل قازاق تىلىنە عانا قاتىستى»، دەپ. ورىس مەكتەپتەرىندە 70 پايىز قازاق بالالارى وقيدى، ولاردى قايتەمىز؟ اقىرى باستاساق، بارلىعىنا بىردەي جاساۋ كەرەك. ورىس مەكتەپتەرىن دە كوشىرۋ كەرەك. ويتپەسەك، 70 پايىز قازاق بالا قايدا قالادى؟ وسىنداي ماسەلەلەردى تالقىلايىق، شەشەيىك، بۇگىنگى جولدايتىن حاتىمىزدا وسىنى كورسەتەيىك»، - دەدى اسانالى ءاشىموۆ.

جيىن سوڭىندا زيالى قاۋىم وكىلدەرى ەلباسى ماقالاسىنا قولداۋ تانىتىپ، ءوز ۇسىنىستارى جازىلعان حاتتى اقورداعا جولدادى.

اۆتور: الماس مۇقاش ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى