الماتىنىڭ قاي جەرىندە ەكى جارىم ميلليون تەڭگەگە تۇنەپ شىعۋعا بولادى؟ - فوتو
NUR. KZ پورتالى 5 جۇلدىزدى قوناق ۇيلەردەگى پرەزيدەنتتىك نومىرلەردىڭ رەيتينگىن قۇردى.
«قازاقستان» قوناق ءۇيى
الماتىنىڭ ەڭ كونە قوناق ۇيلەرىنىڭ ءبىرى «قازاقستان» ليۋكس ساناتىنداعى ورىندارى ءۇشىن تاۋلىگىنە 60000 تەڭگە سۇرايدى. ماسەلەن، سول باعاعا King Suite اتتى ءۇش بولمەلى اۋدانى 60 شارشى مەترلىك ورىنعا يە بولاسىز.
بۇل بولمەدە فەن سەكىلدى قاجەتتىلىكتەردەن باستاپ، ەكى تەلەديدار، دجاكۋزيى بار ەكى جۋىناتىن بولمە مەن كابەلدى تەلەديدار سەكىلدى ىڭعايلىقتار قاراستىرىلعان.
Rixos Almaty وتەلى
قالا ورتالىعىندا ورنالاسقان بۇل وتەلدىڭ ليۋكس ساناتىنداعى ورىندارى ءسال قىمباتىراق - 180 مىڭ تەڭگە نەمەسە 580 دوللار. ەكى قاباتتى بولمەنىڭ فرانسۋز ستيلىندەگى بالكونى، قوناق كۇتەتىن بولمەسى، اس ءۇيى جانە جاتىن بولمەسى بار.
«دوستىق» وتەلى
«دوستىق» وتەلىندەگى پرەزيدەنتتىك نومىرلەر ءۇش بولمەسىمەن، دجاكۋزي، ءىرى توسەك، ساۋنا جانە وزگە دە ىڭعايلىقتارىمەن بەرىلەدى. وندا ءبىر تاۋلىك وتكىزسەڭىز، 224000 تەڭگە نەمەسە 717 دوللار تولەۋگە ءازىر بولىڭىز.
Rahat Palace
ال راحات پالاستىڭ پرەزيدەنتتىك ءنومىرى تاۋلىگىنە 246400 تەڭگە نەمەسە 800 دوللار تۇرادى. بولمەنىڭ اۋدانى - 170 شارشى مەتر.
وندا قوناق كۇتەتىن بولمە، جۇمىس بولمەسى، جاتىن ورنى، اشىق تەرراسا، سويلەسۋگە ارنالعان بولمە، جۋىناتىن بولمە قاراستىرىلعان. ەگەر ەكى تاۋلىككە الاتىن بولساڭىز، 500 مىڭ تەڭگەڭىزدى ازىرلەي بەرىڭىز.
Royal Tulip
تۋريستەر ليۋكس ساناتىنداعى بولمەلەر ءۇشىن تاۋلىگىنە 1020 ەۋرو نەمەسە 337620 تەڭگە قالدىرىپ كەتەدى. وندا اس ءۇي، ەكى جاتىن بولمەسى، دجاكۋزي، ءۇش تەلەديدار جانە ماسساج جاسايتىن كرەسلو بار.
Donatello Boutique
Donatello Suite اتتى بولمەنى بولەك ءبىر پاتەر دەۋگە بولادى. ونىڭ اۋدانى - 110 شارشى مەتر. قوناق كۇتەتىن بولمەسى، جاتىن بولمەسى جانە اسحاناسى بار.
قوناق ۇيدە پرەميۋم-برەندكە جاتاتىن Etro Milano كوسمەتيكالىق بۇيىمدارى جانە جەكە بار ۇسىنىلادى. مۇنىڭ ءبارى تاۋلىگىنە 453600 تەڭگە نەمەسە 1451 دوللار بولماق.
«ينتەركونتينەنتال» وتەلى
مۇنداعى ليۋكس ساناتتى ورىنداردىڭ اۋدانى - 206 شارشى مەتر.
جاتىن بولمەسى، قوناق كۇتەتىن بولمە، ەكى اسحانا، دجاكۋزيى بار جۋىناتىن بولمە ءۇشىن تاۋلىگىنە 396000 - 480000 مىڭ تەڭگە نەمەسە 1270 - 1540 دوللار تولەيسىز.
Ritz Carlton
ال ەڭ قىمبات ليۋكس ساناتىنداعى بولمەنى Ritz Carlton وتەلىنەن تاباسىز. ول قالانىڭ ەڭ قىمبات ايماعى - ءال-فارابي ماڭىندا ورنالاسقان. بولمەنىڭ اۋدانى - 215 شارشى مەتر. ءوز قوناق كۇتەتىن بولمەسى، جاتىن بولمەسى، ەكى جۋىناتىن بولمە بار.
ەڭ باستىسى بولمەدەن الاتاۋدىڭ كوز تارتار كورىنىسىن تاماشالاي الاسىز. بۇل بولمە ءۇشىن تاۋلىگىنە 2500000 تەڭگە نەمەسە 8 مىڭ دوللار بەرەتىندەر بار.
