لاتىن الىپبيىنە كوشۋ ارقىلى ۇلتتىق بولمىسىمىزدى ساقتاپ قالامىز - كوپەن امىربەك
بۇل تۋرالى بۇگىن ق ر مادەنيەت جانە سپورت منييسترلىگى جانىنداعى قوعامدىق كەڭەستە بەلگىلى ساتيريك، جۋرناليست كوپەن امىربەك مالىمدەدى.
«رۋحاني جاڭعىرۋدى ەلباسى بۇگىن كوتەرىپ وتىرعان جوق. بۇرىننان قوزعاپ كەلە جاتىر. نازاربايەۆتىڭ ۇلتتىق جاڭعىرۋ تۋرالى باياعىدا ايتقان ءسوزى ەسىمدە قالىپتى. ۇلتتىق جاڭعىرۋ - سانانىڭ كەمەلدەنۋى، سانانىڭ ءپىسىپ-جەتىلۋى. ول ءۇشىن نە ىستەۋ كەرەك؟ ەل بولۋىمىز كەرەك. ەل بولۋ ءۇشىن نە ىستەۋ كەرەك؟ ەل بولۋعا ۇلتتىق رۋح كەرەك. ۇلتتىق قاسيەت جانە ۇلتقا دەگەن سەنىم كەرەك دەپ ەدى. دۇنيەدە قازاق دەگەن ەل بىرەۋ. دەمەك ونىڭ ۇلتتىق بولمىسى، ۇلتتىق سانا-سەزىمى، ادەت-عۇرپى بارشا قازاققا ءتان. ونىڭ عاجايىپ مول رۋحاني قازىناسى ءبولىپ-جارۋعا جاتپايتىن ورتاق بايلىق ەكەنىن دە ەلباسى ايتتى. ياعني، ءبىزدىڭ ۇلتىمىزدىڭ تۇتاس بولمىسى - ءبىزدىڭ بايلىعىمىز. ءبىز وسى بايلىقتى بارىنشا يگەرىپ جاتىرمىز با، جوق الدە اجىراپ بارا جاتىرمىز با؟ مىنە، ۇلتتىق جاڭعىرۋ دەگەن وسى»، - دەپ اتاپ ءوتتى ك. امىربەك.
«سوناۋ 70-جىلدارى «موي ادرەس - سوۆەتسكي سويۋز» دەگەن ءان دۇنيە ءجۇزىن شارلادى. ونىڭ تۇپكى ماقساتى - سول زاماندا كەڭەس ۇكىمەتىندەگى جۇزدەن استام ۇلتتى جويىپ، ءبىر عانا كەڭەس ۇكىمەتىنىڭ ازاماتتارىن شىعارۋ ەدى، - دەپ جالعاستىرادى ول.
«ۇلتتىڭ اتى جويىلعان سوڭ، ءوزى دە جويىلادى عوي. سونى ءبىز نامىسپەن ساقتاپ قالدىق. 1986-جىلى جەلتوقساندا ورتاق ۇلت جاساۋدىڭ جولى كەسىلدى. ۇلت بولىپ قالعانىمىز ءۇشىن باقىتتىمىز».
ونىڭ پىكىرىنشە، ۇلتتى ساقتاپ تۇرعان ءبىرىنشى قاسيەت - ونىڭ عاجايىپ ءتىلى. «ەلباسى ءبىر سوزىندە بارلىق سالاداعى ءىس-قاعازدارىمىز مەملەكەتتىك تىلگە تولىق كوشكەندە، قازاق ەلى دەپ اتالامىز دەدى. بۇگىنگى ەلباسىنىڭ باعدارلاماسىن ەرتەڭگى كۇنى باقىتقا اپاراتىن باسپالداق دەر ەدىم. ەندى سول باسپالداقپەن كوتەرىلىپ، جوعارى ورلەۋىمىز كەرەك»، - دەپ اتاپ ءوتتى كوپەن امىربەك.
اۆتور: ايجان سەرىكجان قىزى
