مەملەكەتتىك قىزمەتشىلەرگە ناماز وقۋعا تىيىم سالۋ - تۇبەگەيلى شەشىلگەن جوق - مينيسترلىك
ارىننىڭ سوزىنشە، مينيسترلىككە وسى جانە باسقا دا ماسەلەلەر تۋرالى ۇسىنىستار ءتۇسىپ جاتىر، ول ۇسىنىستاردىڭ اراسىندا مەملەكەتتىك قىزمەتشىلەردىڭ جۇمىس ۋاقىتىنىڭ ءتارتىبىن ساقتاماۋىنا قاتىستى شاعىمدار دا بار. اسىرەسە، ازاماتتار مەملەكەتتىك قىزمەتشىلەردىڭ جۇمىس ۋاقىتىندا ءدىني عيماراتتارعا بارۋىنىڭ جانە ءدىني جورالاردى وتەۋىنىڭ قانشالىقتى زاڭعا سايكەس كەلەتىنىنە تۇسىنىك بەرۋدى سۇراعان ساۋالدار كوپ.
«ەلىمىزدىڭ كونستيتۋتسياسىنا سايكەس ءار ازاماتتىڭ ار- ۇجدان بوستاندىعىنا كەپىلدىك بەرىلەدى. دەگەنمەن، ءبىز مەملەكەتتىك قىزمەتتىڭ بۇل سالادا جۇمىس ىستەيتىندەرگە ءبىرقاتار شەكتەۋلەر قوياتىنىن ۇمىتپاۋىمىز كەرەك. مەملەكەتتىك قىزمەتكە كەلمەستەن بۇرىن ادام مۇنداي شەكتەۋلەرمەن كەلىسەدى. ارينە، بۇل تۇسىنىكتى، ويتكەنى مەملەكەتتىك قىزمەتشى ەڭ الدىمەن ءوزىنىڭ تىكەلەي لاۋازىمدىق مىندەتتەرىن ورىنداۋى كەرەك. ماسەلەن، جۇمىس ۋاقىتىندا ازاماتتاردى قورعاۋعا نەمەسە قىزمەت اتقارۋعا مىندەتتى اسكەري قىزمەتكەر نەمەسە پوليتسەي ءدىني ءىس- شاراعا قالاي قاتىسادى؟»، - دەدى ۆيتسە- مينيستر.
سونىمەن قاتار، ونىڭ ايتۋىنشا، مەملەكەتتىك قىزمەتشىلەردىڭ ءدىني ۇيىمدار قىزمەتىنە قاتىسۋىنا بايلانىستى شەكتەۋلەر 2015 -جىلى بەكىتىلگەن قازاقستان رەسپۋبليكاسى مەملەكەتتىك قىزمەتشىلەرىنىڭ ادەپ كودەكسىندە بار ەكەنىن ەسكە سالدى.
«ەكىنشىدەن، بۇل ۇسىنىس بارلىق دىنگە سەنۋشىلەرگە ەمەس، تەك مەملەكەتتىك قىزمەتكەرلەرگە جانە تەك جۇمىس ۋاقىتىنا عانا قاتىستى. سونداي- اق بۇل ماسەلە مۇسىلماندارعا عانا ەمەس، ءدىني سەنىمىنە قاتىستىلىعىنا قاراماستان بارلىق مەملەكەتتىك قىزمەتشىلەرگە قاتىستى. ۇشىنشىدەن، مۇنداي شەكتەۋلەر مەملەكەتتىك قىزمەتشىلەردىڭ ءدىني سەنىم قۇقىعىن تاپتامايدى. ءاربىر ازامات، ونىڭ ىشىندە مەملەكەتتىك قىزمەتكەر قۇدايعا سەنۋگە نەمەسە سەنبەۋگە قۇقىلى. ءبىراق، ءدىني سەنىمدى ورىنداۋمەن بايلانىستى پراكتيكالىق ارەكەتتەر باسقا ازاماتتارعا جانە مەملەكەتتىك قىزمەتكە كەرى اسەرىن تيگىزبەۋى قاجەت»، - دەدى د. ارىن.
ءسوز سوڭىندا ول، بۇل ۇسىنىستار مەن تۇزەتۋلەر ءالى دە بولسا تالقىلانۋ ۇستىندە ەكەندىگىن جانە بۇل تۋرالى تۇبەگەيلى شەشىم ءالى قابىلدانعانباعاندىعىن ءمالىم ەتتى.
اۆتور: جاسۇلان جولدىبايەۆ
